Sas tratativas pro sa formatzione de su guvernu danesu sighint sena de tènnere èsitu. A pustis de prus de unu mese dae sas eletziones polìticas de su 24 de martzu, chi ant decretadu unu passu in segus de su Partidu Sotzialdemocràticu de sa premier Mette Frederiksen, galu non si bidet una bia de essida.
Frederiksen, incarrigada comente primu ministru in essida de chircare de fàghere nàschere una coalitzione noa, pro como at agatadu s’interessu de sos partidos prus de manca ebbia.
In unu primu momentu siat sos Moderados siat sos Liberales, sos alleados prus importantes in su guvernu betzu, ant espressadu sa contrariedade a istrìnghere acordos cun sas formatziones prus a manca.
Sas dificultades a atzapare una solutzione dae parte de Frederiksen aiat ispintu sos duos responsàbiles de sos Moderados, Rasmussen, e de sos Cunservadores, Juul, a decrarare chi s’ex primu ministru diat dèpere rinuntziare a su mandadu esplorativu.
Como però paret chi sos Moderados siant cambiende idea. Sa cosa at causadu sa reatzione de Mona Juul, chi at decraradu, oe 30 de abrile a sa televisione TV2, ca Rasmussen no est mantenende sas promitas fatas in campagna eletorale de non chèrrere fàghere un’acordu cun sa manca e «como est sètzidu cun sos chi aiat naradu craru e tundu de non pòdere fàghere polìtica econòmica paris».
Juul at apretadu a Rasmussen a torrare a una positzione prus burghesa in lìnia cun s’eletoradu suo e at cunfirmadu ca no at a partetzipare a una coalitzione de guvernu tropu de manca.
Sos temas polìticos in s’istadu iscandinavu sighint a èssere massimamente duos: s’immigratzione, chi finas sos Sotzialdemocràticos ant cumintzadu a cunsiderare unu problema, e in polìtica èstera sas relatziones cun sos Istados Unidos, chi cun s’amministratzione Trump ant fatu a ischire de si chèrrere impossessare de sa Groenlàndia, unu de sos istados costitutivos de su Regnu de Danimarca.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22