Arribant règulas europeas noas in contu de cybersecurity pro garantire sa seguresa de sos produtos hardware e software. A las àere propostas est sa Commissione europea annuntziende una lege noa pro su chi pertocat sa “resilièntzia informàtica”, su “Cyber Resilience Act”; custu at a introduire recuisitos de seguresa obligatòrios pro sos trastos digitales. Sos produtores ant a dèpere dare suportu obligatòriu pro sos agiornamentos software e sa seguresa, garantende a sos utentes informatziones subra sa seguresa (esempru, sas vulnerabilidades) de su chi còmporant.
Segundu sos datos evidentziados dae sa Commissione, sos atacos ransomware (aplicativos malèsigos chi infetant unu dispositivu limitende·nde s’atzessu) corfant un’organizatzione cada 11 segundos in totu su mundu cun costos artos meda. Cando sa lege l’ant a adotare, sos operadores econòmicos e sos istados membros de s’UE ant a àere duos annos pro s’adeguare.
Gianfranca Orunesu
(foto Ansa)