Cospito lassat sa presone de Tàtari, ma sighit s'isciòperu

Cospito lassat sa presone de Tàtari, ma sighit s'isciòperu

A pustis de prus de tres meses de isciòperu de su fàmene contra a su 41 bis, ant tramudadu a Alfredo Cospito dae su càrtzere de Bancali a su repartu mèigu de sa presone de Òpera in Milanu. Sas cunditziones suas sunt graes e sos dutores e sos abogados sunt in pidinu ca a bellu a bellu est morende. Custa noa lompet a pustis de unu fine chida de manifestatziones in Roma chi ant postu in abbolotu sa capitale e sos giornales.

Alfredo Cospito l’ant cundennadu comente una de sas ghias de su FAI (Federazione Anarchica Informale) chi in su 2006 at postu una bomba in s’iscola militare de Fossano, chi at tzocadu sena fèrrere nemos. Cospito est istadu cundennadu fintzas pro àere fertu a sas ancas a su dirigente dell’Ansaldo, Roberto Adinolfi in su 2013. Su 41 bis bi l’ant dadu a pustis de una pariga de artìculos suos chi pro sos giùighes pariant dare lìnias de atzione a sos anàrchicos, proende in custa manera su rolu suo in progetos de bortuladura de s’Istadu.

Sa dibata chi naschet dae custa cundenna est manna. Su 41bis est nàschidu pro batalliare contra a sa màfia, cun sa punna de arressare sas ghias de grupos criminales mannos e perigulosos meda. Pro custa resone su cundennadu abarrat aoradu dae sos àteros presoneris, sas bàrdias suas sunt diferentes dae sas comunas, podet addobiare sos parentes suos una borta a su mese ebbia e partzidos dae unu bidru. Sas medidas sunt ammanigiadas pro non trasmìtere messàgios a fora de su càrtzere e gasi segare sa gerarchia. Ma inoghe semus faeddende de crìmines chi non b’intrant nudda cun sa graesa chi pertocat su 41bis, contra a un’organizatzione chi non cheret gerarchias e ghias.

Su casu Cospito at barigadu sas Alpes e est lòmpidu a s’Europa, chi aiat giai cundennadu su 41bis comente unu sobradu de pena. E custa situatzione est fintzas una letura noa de sa lege. S’amministratzione de sa giustìtzia italiana, però, est leende tempus: su Ministru non dat risposta peruna, sa Cassatzione at seberadu chi detzidet a martzu e sos àteros ufìtzios sunt fatende comente a Pilatu. Su guvernu, dae parte sua, cheret ammustrare sos mùsculos e proare chi est forte e tèteru.

Non si faeddat de cantu est simpàticu o galanu s’anàrchicu, o si est innotzente, ma de sa proportzionalidade de sa pena e si est giustu a lu fàghere mòrrere sena sensu perunu, comente a Doddore Meloni. Sa pregunta de importu est tando: est giustu inghitzare a impreare su 41bis pro delitos chi nudda b’intrant cun sa màfia, ma chi pertocant de prus sa polìtica e sa defensa de s’Istadu?

(redatzione)

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *