Su FLNC, Fronte di Liberazione Naziunale Corsu, at imbiadu a su giornale Corse Matin unu comunicadu in ue at rivendicadu una sèrie de atendados contra a residences e villas fatos intre su 2022 e su 2023.
Su grupu clandestinu in sa rivendicatzione at tocadu sa chistione de sos permissos de fràigu cuntzèdidos a istràngios, massimamente frantzesos, in s’ìsula, chi, narant sos indipendentistas, rapresentant una forma de colonizatzione.
Difatis sas istruturas alberghieras e residentziales sighint a crèschere, pro su prus in sos logos de mare, mentras, est custa s’acusa de su Fronte, sighint a mancare, dae parte de sa Frantza, investimentos sèrios pro sa viabilidade, sos ispidales e sas iscolas, setore in ue s’ìsula tenet unu ritardu istòricu.
Pro custa situatzione su Fronte ghetat sas neghes finas a una parte de sos sìndigos e a sa Prefetura.
Su FLNC annùntziat chi at a sighire s’atividade clandestina, ca non tenet fide in sos negotziados cun s’istadu chi diant dèpere leare sa Còrsica a unu “status de emantzipatzione polìtica”.
Su comunicadu est istadu imbiadu su 21 de martzu, anniversàriu de sa morte de Ivan Colonna, ammentadu in su documentu.
Su militante indipendentista fiat in presone cun s’acusa de àere mortu su prefetu Claude Erignac in Ajaccio in su 1998. Ocannu passadu, in sa presone de Arles, dd’at afogadu unu presoneri camerunesu, integralista isàmicu. Su fatu est capitadu su 2 de martzu. Colonna, in coma, est mortu a pustis de 19 dies de agonia.
In sa rivendicatzione su movimentu indipendentista corsicanu at espressadu crìticas a sa cummissione de inchiesta chi s’est ocupende de sa morte de Colonna chi issos cunsìderant una morte polìtica.
Su Fronte di Liberazione Naziunale Corsu est istadu fundadu in su 1976. In su 2014 aiat annuntziadu sa fine de sa luta armada.
Su comunicadu, de tres pàginas, iscritu in frantzesu, acabat cun sas iscritas A ragione he la nostra forza e A populu fattu bisognu a marchja.
(gianni muroni)
Leave a comment