Foto leada dae rfef.es
Sa Real Sociedad at bintu sa Copa de su Re de Ispagna de fùbalu. In sa finale de sàbadu 18 de abrile, giogada in s’istàdiu La Cartuja de Sivìllia, s’iscuadra de Santu Sebastianu at bintu a s’Atlético Madrid a sos tiros de rigore a pustis chi est finida 2-2.
Sos bascos sunt passados in bantàgiu a pustis de 13 segundos cun unu corpu de conca de s’ala destra Barrenetxea. Sos biancurujos ant paregiadu a su 18’ cun unu tiru cun su pee de manca de Lookman, serbidu dae Griezmann. A s’ùrtimu minutu de su primu tempus su tzentratacu Oyarzabal at marcadu de rigore pro unu fallu de su portieri de s’Atlético Musso contra a Guedes.
In su segundu tempus sos atacos de s’iscuadra de Madrid ant tènnidu èsitu a su 83’ cun sa rete de s’atacante argentinu Álvarez, chi s’est lìberadu de s’aversàriu cun unu corpu de tacu de su pee de destra e cun s’àteru at iscutu a sa rughe de sos palos a sa manca de Musso.
In sos suplementares semper Álvarez at leadu sa traessa a su 9’ de su primu tempus. Sa Real Sociedad però s’est assentada e at frenadu sas initziativas de su contràriu.
Sa partida duncas dd’ant detzìdida sos tiros de rigore. Protagonista assolutu est istadu su portieri bascu Marrero, riserva de Remiro ma titulare in sas partidas de copa. At paradu sos primos duos tiros de s’Atlético benende a èssere detzisivu pro sa vitòria, bidu ca sos cumpàngios ant mantènnidu su bantàgiu. Custa sa sèrie: Sørloth (AM) paradu, Soler (RS) rete, Álvarez (AM) paradu, Óskarsson (RS) paradu, González (AM) rete, Sučić (RS) rete, Almada (AM) gol, Muñoz (RS) rete, Baena (AM) rete, Marín (RS) rete.
Si sunt cunfrontadas a unu chirru una de sas prus iscuadras ricas de Ispagna e de Europa, s’Atlético, e a s’àteru una chi est fata pro su prus dae giogadores nàschidos e crèschidos in su Paisu Bascu.
In zona retrotzessione in su mese de nadale, sa Real est torrada a bia pro more de su tècnicu nou, s’italoamericanu Pellegrino Matarazzo.
Pro sa Real Sociedad est sa de bator copas natzionales, chi s’agiunghent a sos duos campionados de su 1981 e de su 1982.
Atlético Madrid: Musso; Molina (Johnny 78’), Pubill, Le Normand, Ruggeri (González 62’); Simeone (Almada 69’), Llorente (Lenglet 99’), Koke, Lookman (Sørloth 62’); Griezmann (70’ Baena), Álvarez. Tècnicu Simeone. In panchina sunt abarrados: Oblak, Boñar, Mendoza, Barrios, Vargas.
Real Sociedad: Marrero; Aramburu (Elustondo 113’), Martín, Čaleta-Čar, Gómez (Kubo 88’); Turrientes (Gorrotxategi 68’), Soler; Barrenetxea (Marín 68’), Sučić, Guedes (Muñoz 78’); Oyarzabal (Óskarsson 78’). In panchina sunt abarrados: Remiro, Beitia, Herrera, Méndez, Wesley.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment