“De s’iscola non si nde depent ammentare petzi ca est sede de una setzione eletorale”.
A lu iscrìere in una nota est su Coordinamentu de sos presidentes de sos Consìgios de Istitutu de sa Sardigna, ue faeddant de sas eletziones polìticas de su 25 de cabudanni e de sa mancàntzia de su tema iscola in su dibàtidu eletorale. Totu sas fortzas polìticas si sunt impinnende pro agatare acordos in gradu de li garantire cantos prus votos possìbile pro guvernare in sos 5 annos imbenientes.
“Ma in mancunu programma eletorale s’agatat sa paràula iscola, – si leghet in sa nota – de totu sas promissas fatas in sos ùrtimos duos annos, in s’ìnteri de sa pandemia, non si nde bidet mancuna acumprida, totus postas a banda pro chistionare de argumentos chi interessant de prus a sa gente. Fortzis sa paràula iscola non nde faghet balangiare de votos, non lis interessat a pessare a su benidore o ischire chi medas de custos giòvanos podent divènnere sos guvernantes de cras. Fortzis non lis interessat ca totu custos istudiantes no ant galu s’edade pro andare a votare. Iscunnortat a bìdere comente totus sunt afannados chirchende votos – concruit su Coordinamentu – ma non cumprendent chi pro garantire su benidore de una natzione depent pessare oe a sos giovanos”.
Mariantonietta Piga
Leave a comment