Dae custas dies chie cheret intrare in Sardigna si diat dèpere fàghere compidare o dare carchi garantzia da sa salude sua. Custas sunt sas medidas seberadas dae sa Regione:
- Cada persone chi cheret bènnere in Sardigna cun navios o aèreos, prima de tzucare si diat dèvere registrare in su giassu in retza de sa Regione o in s’aplicatzione “sardegna sicura”;
- Onni biagiadore, in su momentu de sa pigada in su naviu o in s’aèreu, diat dèvere ammustrare sa retzida de sa registratzione a sa cumpannia cun chie est tzuchende;
- Sos passegeris podent proare chi s’ant giai fatu su vatzinu o unu tampone in sas barantoto oras a dae in antis a su biàgiu;
- Chie non si nche est fatu nen su vatzinu nen su tampone podet fàghere tres cosas:
- Andare in sas zonas sestadas in sos portos e sos aeroportos pro compidare sos chi sunt suprende e in ie si diat pòdere fàghere su tampones antigenicu: si s’anàlisi est negativa podet sighire su biàgiu suo, si est positivu diat dèpere sighire sas protzeduras contra a su Covid;
- In sas barantoto oras posca s’intrada in Sardigna podet andare a si fàghere unu tampone in un’istrutura reconnòschida;
- Si non sèberat nen sa prima nen sa sigunda optzione, depet istare pro deghe dies assoladu in sa domo sua, narende•lu a su dutore de famìllia o a sa ASL.
Sas medidas de sa Regione sufrint però de una tortesa (sa matessi chi Limba Sarda 2.0 at analizadu inoghe) chi est fìgia de sas leges italianas: b’at s’òbligu de pagas cosas.
E in prus sas làcanas si podent inghiriare cun fatzilidade, pro esempru, chie benit in Sardigna pro nen mancu barantoto oras podet brincare sos compidos.
Sa cosa bona est però chi como sa Regione at ammanigiadu logos e mèdios pro compidare chie lompet in s’ìsula. Sa punna est de allentare sas variantes de su Covid e cùrrere cun sos vatzinos.
(redatzione)
Leave a comment