Comente reconnòschere sos chi sunt contra a sa sanidade pùblica

Comente reconnòschere sos chi sunt contra a sa sanidade pùblica

S’idea est chi non b’apat cristianu contràriu a una sanidade fata a bìculos. De manifestatziones in difesa sua bi nd’at àpidu finamentas custu fine de chida. Sos polìticos chi l’ant destruida, intreverende·si in su cùcuru de sa gestione, nche sunt in intro de custa categoria de cristianos. Ca a faeddare de sanidade est comente a faeddare de sa paghe. Totu cantos la cherent ma nemos b’at chi bi punnet a beru. Sa lògica de su mercadu nche giughet su dinare a aterue e sa lògica de s’istrale corfet in ue b’at istruturas perifèricas. Case della comunità, ospedali di comunità e àteros sunt sos nùmenes altisonantes che a su de missione di pace pro caratzare sa gherra. Ospidales bi cherent! E Puntos de primu interventu. Thiniscole, esempru. Gasi tzentrale intre Nùgoro e Terranoa bortas medas non b’at guàrdia mèiga, àteras bortas nemmancu guàrdia mèiga turìstica e su poliambulatòrio nd’est ruende metaforicamente a cantzos. E puru unu “Pronto soccorso” diat èssere de giudu pro totus sos comunes de su distretu e diat illebiare su de Nùgoro. Ma sas manifestatziones sunt pro màntennere su chi nos sunt lassende. Bene su matessi e bene chi bi siant. Ma bi diat chèrrere una prataforma prus atzuda movende dae sos bisòngios in intro de unu programma prus complessivu de trasformatzione de sa Sardigna (e tando istrutzione, trasportos, tecnologia, edilìtzia e manifatura). Tando at a èssere prus fàtzile a ischiere chie cheret ite e chie nono.

màuru piredda

foto ansa

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *