Ammentemus·nos·lu cale fiat s’obietivu de s’Acòrdiu climàticu de Parigi. Su 2015 fiat. Chentu norantachimbe paisos lu firmeint e, a pustis de una ratìfica dae parte de 55 istados, intreit in vigore su 4 de santugaine de s’annu a pustis. Sas punnas fiant custas: mantènnere s’aumentu de sa temperadura suta de sos 2 grados (mègius intro de 1,5); lòmpere a una produtzione de gas serra a tretu de èssere issa suspida dae sa terra in manera naturale; versare 100 milliardos de dòllaros cada annu a sos paisos prus pòveros pro los agiudare a isvilupare fontes de energia prus pagu incuinantes; averguare sos progressos cada chimbe annos. Como, oto annos a pustis, amus un’istima noa de sa Wmo, s’organizatzione meteorològica mundiale, sa de s’1,5 chi nche l’amus a colare in antis de su 2027. Ma perunu problema! Sa Wmo matessi narat chi nche semus in foras de s’obietivu si nche barigamus su +1,5 pro nessi binti annos. Duncas, sa noa est chi intro de su 2027 b’at prus de una probabilidade (bi nd’at duas de tres) chi nche colemus su lìmite pro un’annu («The chance of global near-surface temperature exceeding 1.5°C above preindustrial levels for at least one year between 2023 and 2027 is more likely than not (66%)». De custa manera, ipòtesi, colende·nche·lu (e de cantu?) pro 19 annos (s’unu in fatu a s’àteru o a annos bàrigos?), non nche semus in foras de s’obietivu de sa cunferèntzia parigina. Non b’at male, no. Sas abbas faladas custas dies ant a èssere sas prus lenas cunforma a sas chi amus a connòschere? S’istiu de s’annu coladu at a èssere prus friscu de sos imbenientes? In s’ìnteri chi istamus gioghende cun sos datos e impreende sas tzifras a praghere nostru (a praghere nostru mànigu de trudda! su 1.5 de Parigi fiat unu lìmite polìticu essidu a a capu a pustis de maicantos cumpromissos), su disacatu lu semus bidende die cun die. Acartzonemus·nos.
màuru piredda
Immàgine wmo
Leave a comment