Luego amus a àere su de 13 presidentes de sa Repùblica italiana. Sergio Mattarella, chi duas chidas a como at serradu s’annu narende·nos chi su chi nch’ant a sètzere a pustis suo devet èssere una persone a tretu de nche pònnere a un’ala sas bestes polìticas betzas, serrat su mandadu setennale in tempos de pandemia globale e de traschia polìtica cun sa majoria partzende·si in contu de òmines de nch’artziare a su “colle”. Su tzentru dereta, unidu, at naradu chi su de 13 devet èssere Silvio Berlusconi. Chi no est unu nùmene cumpartzidu dae totu s’arcu parlamentare pro sos motivos chi no est nemmancu de giudu a torrare a elencare. In intro de cussa coalitzione, de custa manera, Forza Italia nche diat lòmpere a sa presidèntzia mancari siat minoritària; Fratelli d’Italia narat chi nono a Draghi pro cussu iscrannu a pustis de bi l’àere naradu pro sa presidèntzia de su Consìgiu (e de custa manera, lassende·nche·lu in Palazzo Chigi, sighit a èssere s’ùnica opositzione); sa Lega in crisi mustrat de èssere in fatu a sos primos e a sos segundos. Sos de Salvini si nche sunt essidos cun sa chistione de su “garantismu” (a dae chi su presidente de sa Repùblica, l’ischimus, est a cabu de su Csm). Ma tando, si custa est sa ghia de s’arresonu, diat èssere fàtzile pro Pd e M5s su sèberu de s’alternativa. Si Stefano Rodotà si nch’est mortu, tando est possìbile e cunvèrgere subra su nùmene de Luigi Manconi, s’e senadore tataresu chi de garantismu nd’ischit carchi cosighedda. Sa proposta no est noa e giai da su 2015 su nùmene suo lu fadeit Christian Raimo. Pro gasi, su garantismu de Manconi, chi est finamentas pro una propassada de su sistema-presone, no est su chi agradat a sos garantistas a dies bàrigas che a sos de Salvini. E si no lu proponent est ca no agradat nemmancu a su bonu de su partidu suo, su Pd. Ca comente aiat naradu isse etotu, «chie si interessat de galera perdet votos».
postilla: custu artìculu no est unu consìgiu a tzentru manca e a pentisteddados (giai nde tenent e chi si los tèngiant) cantu su fàtzile iscumprou de una distàntzia de cussos partidos dae sa realidade. Sa dibata odierna interna a su Pd lu narat a craru e su M5s chi cheret torra a Mattarella a pustis de àere propostu s’impeachment fintzas de prus. Sos èsitos de sas sas eletziones pro su Quirinale ant a èssere finamentas s’iscumprou de s’utopia de Raimo, chi si faddit cando narat chi Manconi diat àere «un consenso vasto di una vasta schiera di parlamentari».
màuru piredda
Leave a comment