– de Salvatore Serra –
Cun su manìgiu de s’astrometria, est a nàrrere mirende un’isteddu pro bìdere si est bantzighende, ca custu cheret nàrrere chi lu sunt tochende fortzas gravitatzionales, s’Universidade de Sydney punnat a agatare esoplanetas in ue b’apat vida in su sistema de Alfa Centauri. Pro fàghere custu ant a impitare su “Telescope for the Locus Orbit Interferometric Monitoring of our Astronomical Neighborhood”, est a nàrrere “Telescòpiu pro sa Supervisione Interferomètrica Locus Orbit de su Bighinadu Astronòmicu nostru” (TOLIMAN est su nùmene antigu de Alfa Centauri in àrabu). Ant finas firmadu unu cuntratu cun EnduroSat, unu provididore mannu de microsatèllites e servìtzios ispatziales, pro tènnere su sistema de cunsinna e su minisatèllite personalizadu chi ant a bisongiare pro sa missione.
Alfa Centauri est su sistema istellare prus a curtzu a nois, ca s’agatat petzi a 4,376 annos lughe de distàntzia. Mancari siat gasi probianu, sos istùdios astronòmicos chi ant fatu finas a como no ant dadu sa proa chi b’apat esoplanetas.
Alfa Centauri est formadu dae un’isteddu primàriu de tipu G (comente su sole nostru) e un’isteddu segundàriu de tipu K (nanu in colore de arantzu). Pro more de custu caràtere binàriu, est resurtadu difìtzile a assebertare sinnales chi diant pòdere èssere su resurtadu de esoplanetas.
Finas a como sos astrònomos ant reportadu unos cantos sinnales possìbiles dae Alfa Centauri. Sa prima borta est acuntèssidu in su 2012, cando pariat chi b’aiat unu sinnale RV dae Alfa Centauri B chi l’aiant atribuidu a unu pianeta (Alfa Centauri Bb), ma chi si fiat disveladu unu positivu farsu in su 2015. Unu trànsitu planetàriu possìbile l’ant annuntziadu in su 2013, ma nat chi fiat tropu a curtzu a s’isteddu primàriu suo pro permìtere sa vida. In su 2021, unu pianeta candidadu chi l’ant postu a nùmene Candidadu 1 (C1) ant crèidu de l’assebertare a curtzu a Alfa Centauri A impitende imàgines tèrmicas diretas, ma galu non b’at cunfirmas.
Leave a comment