Su deghe de làmpadas chimbe cumandantes de s’esèrtzitu italianu depent torrare a su tribunale de Casteddu chi at a seberare comente sighire su protzessu pro disacatu ambientale, chi oe s’est abertu cun un’istransida. Sos chimbe militares difatis sunt acusados de àere sa neghe de àere prenadu de luòngiu sa penìsula Delta, sa parte prus a suta de sa Sardigna chi est impitada dae s’Istadu comente polìgonu.
Custa borta comente parte tzivile, francu sos assòtzios Gruppo di Intervento Giuridico (pro sa defensa de s’ambiente e de sas biddas a curtzu) e su Partito tutela diritti dei militari (pro amparare sos deretos de sos sordados chi est dàbile chi si siant ismalaidados pro neghe de su luòngiu), b’at fintzas sa Regione Sardigna.
Sos imputados sunt: Giuseppe Valotto de Venètzia; Claudio Graziano e Danilo Errico de Turinu, Domenico Rossi de Roma, e Sandro Santroni de Ancona. Ant totus grados artos e totus ant cobertu rolos de responsabilidade in sa base de Teulada. In ie dae su 2008 fintzas a su 2016 sunt istados isparados e iscopiados chimbighentos chimbanta tonnelladas de bombas de diferentes genias, de custas si pensat chi bi siant istadas fintzas cussa fraigadas cun materiales tòssicos meda.
A pustis de su protzessu pro su luòngiu de Chirra, chi no at iscobiadu nudda de sas maladias acontèssidas, amus a bìdere ite at a capitare in custa iscumbata.
(redatzione)
Leave a comment