Chie fiant e dae in ue beniant sos Tres Res de Oriente lòmpidos a Betlemme giughende oro intzensu e mirra pro riverire a su Ninnu Gesùs?
In su Vangelu de Santu Mateu, s’ùnica fonte canònica chi contat de sa bisita issoro a Giudea, s’apòstolu non narat cantos fiant, ma faeddat ebbia de sos donos.
Pro su chi pertocat sa ratza sas possibilidades, cunsiderende sa positzione geogràfica de sa bidda de sa Natividade, sunt su nord de s’Aràbia, Babilonia o sa Pèrsia. E pròpiu in bestimenta persiana fiant ritratos in s’antigòriu. In prus, de orìgine persiana sunt sos nùmenes issoro in s’Oriente cristianu, pro nàrrere in Sìria: Larvandad, Hormisdas, Gushnasaph.
In favore de custa ipòtesi ddo’est sa testimonia de Marco Polo. In su Milione s’esploradore venetzianu narat de àere bidu in sa tzitade persiana de Saba sa tumba de tres res antigos:
In Persia è l[a] città ch’è chiamata Saba, da la quale si partiro li tre re ch’andaro adorare Dio quando nacque. In quella città son soppeliti gli tre Magi in una bella sepoltura, e sonvi ancora tutti interi con barba e co’ capegli: l’uno ebbe nome Beltasar, l’altro Gaspar, lo terzo Melquior. Messer Marco dimandò piú volte in quella cittade di quegli 3 re: niuno gliene seppe dire nulla, se non che erano 3 re soppelliti anticamente.
In custu casu, in s’òpera redatada dae Rustichello de Pisa, sos nùmenes sunt cunforma a sa traditzione otzidentale, sos chi connoschimus galu a dies de oe.
S’otzidente in prus diat pòdere essere su logu in ue sunt sepultados. S’istòria nos contat ca Santa Elena aiat agatadu sos restos mortales issoro in su pellegrinàgiu in Terrasanta in sa prima metade de su de bator sèculos e dae in ie nche ddos aiat leados a Costantinòpoli. A pustis de pagos annos nche ddos aiant mòvidos a Milanu in ue s’imperadore Federicu Barbarossa si nde fiat impossessadu e in su 1164 ddos aiat mandados a Colònia.
In ogna modu sas diferentes traditziones, massimamente cudda orale, faeddant de tres òmines sàbios, ca custu est su significadu de magos, chi sunt intrados in s’istòria de s’umanidade e in su folklore de sa parte cristiana de su mundu.
(gianni muroni)
Leave a comment