S’afungamentu a largu de S’Asinara de sa barca de Giovannino Pinna e Davide Calvia, e sa morte de cust’ùrtimu, sunt torraadas a s’atentzione de s’imprenta natzionale. Su 23 de abrile, sa trasmissione “Le Iene” de Itàlia Uno at torradu a fàghere lughe subra a sa morte de Davide Calvia, tataresu de 37 annos, mortu a pustis de fatos pagu craros. Su casu, a primu fiat istadu achiviadu comente a una disgràtzia fea in mare, oe est a su tzentru de un’inchiesta pro omicìdiu voluntàriu.
S’imbiada Nina Palmieri at postu in pee sos particulares de unu fatu semper prus iscuru. Su servìtziu at mustradu cun fortza sa pista passionale: sa mama de sa vìtima at dadu a ischire de brigas de importu mannu intre a su fìgiu e a su fradile Giovannino Pinna, s’ùnicu chi fiat abbarradu biu in cussa die fea de su 12 de abrile de su 2023. Sos iscòntrios diant pòdere rapresentare su movente de su chi sa Procura non cunsìderat prus un’intzidente.
Su puntu de furriada mediàticu est rapresentadu dae un’àudio choc chi sa trasmissione at fatu iscurtare: un’intertzetatzione ambientale de su 20 de nadale de su 2024: Pinna, solu in sa màchina sua, pispisat a isse matessi pagas paràulas chi astragant su sàmbene: «Mi firmant, lis naro chi l’apo ochìdu torrende dae su molo». Paràulas chi, si cunfirmadas dae sos incuirentes, diant bàlere comente una cunfessione.
Dae su comintzu, su casu at mustradu imbòligos chi non torrant. Su corpus de Calvia, agatadu a pustis de deghe dies in Lu Bagnu, at isfauladu s’idea chi siat annegadu. Difatis, s’autopsia at riveladu fèridas e fraturas a sa colunna vertebrale e a sas petorras, chi podent èssere postas a paragonu cun un’agressione.
Segundu su procuradore Armando Mammone, Pinna diat àere ochìdu su fradile e posca diat àere postu in pee unu naufràgiu fintu, causende de manos suas s’afungamentu de sa barca pro ispèrdere sas proas e agatare un’iscusa pro s’iscumpàrfida de su cumpàngiu. Sa Procura at giai pedidu su “rimbiu a giudìtziu” pro Giovannino Pinna. S’imputadu s’at a dèpere presentare su 27 de maju in antis de su GUP Sergio De Luca pro rispùndere a s’acusa de omicìdiu voluntàriu. Un’atopu de importu pro fàghere lughe subra a una de sas pàginas prus nieddas de sa crònaca sarda de sos ùrtimos tempos.
Bobore Taras
_____________________________________________________________________________________________________________________
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment