Sas eletziones sunt agabbadas domìniga sero, ma non si faeddat de àteru: calicunu est pranghende, calicunu est festende, comente a semper. In pagos si nde sunt ispantados de sa bìnchida de su partidu Fratelli d’Italia, ghiadu dae Giorgia Meloni, ca sos sondàgios lu daiant artu dae meda, ma a s’ispessada carchi partidu est andadu mègius o peus. Pagos votos at leadu sa Lega de Salvini, chi in totue at leadu de mancu de cantu s’isetaiant issos, e como sunt faeddende de cambiare sa ghia de su partidu lombardu. Meda de prus de cantu totu s’isetaiant, a s’imbesse, at leadu su Movimento 5 stelle chi pariat iscumpartu e chi imbetzes est galu forte, mescamente in su sud de s’Itàlia. Su PD lompet segundu e gallìgiat, fintzas si at fatu una campagna eletorale unu pagu murra e leca.
In Sardigna sos resurtos sunt istados unu pagu diferentes a cunfrontu de su chi est capitadu in aterue. Su primu partidu est Fratelli d’Italia cun su 23,6%, ma segundu est su M5S cun su 21,8%, su PD unu pagu prus in dae segus cun su 18,6%. At menguadu meda meda sos votos s’alleàntzia Lega-Psd’Az chi colat dae belle su binti pro chentu de sas Regionales de su 2019 a nemmancu su sete. Custu resurtu est su prus de importu de domìniga pro sa Sardigna ca at obligadu su Presidente Solinas a isorvere sa Giunta pro torrare a la fraigare in sas chidas imbenientes. Su cambiamentu podet acontèssere in giassos medas de sos assessorados, mescamente in sa sanidade. Ma sa dimanda est: custa surra podet fàghere rùere Solinas?
(redatzione)
Leave a comment