Su 30 de martzu est essidu Dare finalmente all’abbandono un movimento e un’anima, de Catartica Edizioni.
Est una riflessione istòrica subra su fenòmenu de s’indipendentismu polìticu dae sa nàschida de su Partidu Sardu a oe.
Ocannu difatis sunt sos chentu annos dae sa fundatzione de su Psd’Az. Sa gènesi cheret chircada in su de tres Cungressos regionales de sos cumbatentes sardos, fatu in Macumere sas dies 8 e 9 de austu de su 1920.
In cussu programma polìticu ddoe fiat s’orìgine de su partidu de sos Bator Moros.
E pròpiu una de sas frases impreadas in cuddu documentu at dadu a sos autores, Cristiano Sabiino e Giovanni Fara, s’idea pro su tìtulu de s’òpera.
Sos duos, ambos militantes indipendentistas, proponent unu recùperu de s’orìgine populare e rivolutzionària de su sardismu, chi, a pàrrere issoro, teniat unu modellu gramscianu, bidu ca su fundadore de su Partidu Comunista d’Italia faeddaiat semper de una liberatzione de s’ìsula dae su colonialismu.
Cristiano Sabino est istadu unu de sos fundadores de A Manca pro s’Indipendèntzia e faghet parte de su colletivu de istudiosos Filosofia de Logu. Giovanni Fara est in sa diretzione natzionale de Sardigna Natzione e in su 2017 at partetzipadu a sa fundatzione de Catartica Editzioni.
Segundo sos autores su progetu indipendentista est fallidu e cheret propostu aterunu manifestu chi siat de ghia a sa liberatzione de sa natzione sarda.
Su libru proponet sos cuntributos de sos duos autores, chi intre sas àteras cosas ponent in evidèntzia sos problemas rapresentadu dae su capitalismu e dae sa mancàntzia de rispetu de sa natura. Sos temas fundamentales sunt s’istòria de su mundu indipendentista de custos ùrtimos annos e una proposta resonada pro sa creatzione de unu movimentu populare sardu.
Dare finalmente all’abbandono un movimento e un’anima si podet comporare in libreria o si nono on line. Su preju est de 13 èuros.
(gianni muroni)
Leave a comment