Carchi annu a como su presidente venetzuelanu Hugo Chávez nargeit chi s’ambiente non fiat una banca e chi duncas non fiat interessu de sos guvernos burghesos su de lu sarvare. Chávez si nch’est mortu giai deghe annos a como; cussas paràulas pertocaiant sas polìticas ativadas a pustis de sas crisi e de su fallimentu de Lehman Brothers, su 2008. Tando sa chistione fiat chi sa banca intreit in crisi a pustis de unos cantos investimentos atrividos e de istrumentos finantziàrios prenos de arriscos. Ma àtera cajone pertocheit cussa crisi, a dae chi in medas, intre sos clientes de cussa banda, sesseint de pagare sas ratas de sos mùtuos issoro subprime. Como, in giru de pagas dies, duas crisi aunint su continente nou cun su betzu, s’Amèrica cun s’Europa, sos Istados unidos cun s’Isvìtzera. In antis ant fallidu sa Silicon Valley Bank e Signature Bank. A pustis sa crisi nch’est lòmpia a inoghe cun sas fòddidas de Credit Suisse. Su chi si timet est su cundimentu in intro de unu sistema prus chi no interconnessu. Cando s’istadu intervengeit pro sarvare custas bancas amus connotu sa fòrmula de sa natzionalizatzione de sas pèrdidas, de su capitalismu pro sos pòberos. Sas dies coladas amus lèghidu chi a Credit Suisse bi cheriat un’interventu pùblicu pro impedire sa còmpora dae parte de un’àtera: cun totu sas cunsighèntzias in contu de antitrust e de litzentziamentos de bancàrios. Semper e canco cussu dinare pùblicu de prestare, 50 milliardos de francos isvìtzeros dae sa Banca tzentrale elvètica, no est bastante pro nde bogare sa banca dae sa crisi. Duncas acò sa proposta de còmpora dae parte de Ubs, chi però – in modalidade linnajola cun àrbore ruta – at ofertu unu preju meda prus bassu: pagu prus de 2 milliardos (in antis fiat unu ebbia). Custu cheret nàrrere chi, in cara de una respinta de cussa oferta, su guvernu isvìtzeru diat pòdere cròmpere a sa natzionalizatzione de Cs. Como deretu a lèghere s’ùrtimu libru de Federico Rampini. Ca est beru, “Non ci salverà lo stato”. A nois.
màuru piredda
immàgine https://www.flickr.com/photos/jeffedoe/423917305
Leave a comment