Sas comunas de Tàtari e de Portu Turres sunt traballende paris pro coordinare s’istasione turìstica chi at a cumintzare in beranu, faghende in modu de crèschere s’oferta pro turistas e pellegrinos, bidu ca s’àrea turritana est interessada dae duos eventos, unu de caràtere làicu e unu de caràtere religiosu, chi atirant ogna annu mìgias de persones.
Sa manifestatzione folclorìstica prus importante de su Cabu de Susu, e de sa Sardigna intrea, est sa Cavalcada Sarda de Tàtari, chi pro traditzione est in su mese de maju.
Ocannu però, imbetzes de sa penùrtima domìniga de su mese, dd’ant a antitzipare a sa segunda, su 12.
Su motivu est pròpiu pro no s’istorbare a pare cun sa bidda portuale, chi ocannu afestat sos Màrtires Turritanos sa penùrtima domìniga de su mese.
Sa tzelebratzione religiosa de sos santos Gaine, Protu e Gianuàriu, sa Festha Manna de sos portuturressos, tenet unu calendàriu variàbile, ca torrat a pare cun Pasca de Frores.
Pro custu motivu su sìndigu e sa giunta comunale de Tàtari ant detzìdidu de cambiare de die sa Cavalcada.
S’ispricatzione dd’at dada su primu tzitadinu tataresu Nanni Campus: «Amus pensadu chi esseret su sèberu giustu pro ghetare una manu de giudu a sas atividades econòmicas chi traballant massimamente in custas ocasiones, che a sas bancarellas chi mudant custas dies; ma finas sos butegheris, sos ristorantes e de gasi sighende, chi de seguru nd’ant a tènnere giudu. Sos operadores turìsticos e a su matessi tempus sos turistas e apassionados ant a pòdere programmare dae luego comente si mòvere pro bìdere ambas duas sas festas. Sos grupos folk ant a pòdere partetzipare a sos diferentes eventos, incruidos sos chi benint in antis e a coa de sas festas prus mannas, sena de èssere obligados a seberare intre sas initziativas de Tàtari e de Portu Turres».
(gianni muroni)
Leave a comment