Casteddu Sardu at a èssere su teatru, pro sa de bintunu editziones, de Pasquetta in Musica.
In diferentes giassos de sa bidda de s’Anglona sa primu die de abrile, lunis de Pasca, s’ant a esibire artistas sardos e istràngios.
Su programma previdet su cumintzu de sos cuntzertos a sas 11,30. In duos palcos, unu in pratza de sa Misericordia e s’àteru a suta de su bastione de sa Guardiola, ant a sonare, intre sos àteros, Carlo Doneddu, Steno Group e su progetu To Be Free, dedicadu a Nina Simone.
A su mesudie a chie cheret podet pràndere in sa zona Spalti Manganella, in ue in prus ant a organizare giogos e àteras atividades pro dare s’istentu a sos pipios.
In fines, a sas chimbe e mesu, in sa pratza Maestro di Castelsardo, tocat a Francesco Piu e a sos Avion Travel.
Piu, chitarrista blues osilesu, afestat ocannu sos 20 de atividade. Comente solista at registradu oto discos, prus unu, su de esòrdiu, autoproduidu. Connotu a livellu internatzionale, at sonadu paritzas bortas in sos Istados Unidos e pro unu tempus at fatu parte de su grupu de Davide Van de Sfroos.
Sos Avion Travel, nàschidos in Caserta in su 1980 comente Piccola Orchestra Avion Travel, sunt veteranos de sa cantzone italiana. Binchidores de su Festival de Sanremo in su 2000 cun Sentimento, ant registradu una bindighina de discos, dae s’EP de esòrdiu, Sorpassando, a s’ùrtimu, Privé, de su 2018. Sa formatzione atuale est: Peppe Servillo (boghe), Peppe D’Argenzio (sax), Duilio Galioto (piano e tastieras), Ferruccio Spinetti (contrabbassu), Mimì Ciaramella (bateria).
Sa Pasquetta in Musica rapresentat sa fine, profana, de sas tzelebratziones, sacras, de Chida Santa, chi in Casteddu Sardu cumintzant cun sa professone de su Lunissanti.
Sa manifestatzione musicale est organizada dae s’amministratzione comunale, paris cun sa Pro Loco e sa Event Sardinia.
(gianni muroni)
Leave a comment