Pro prus de unu mese, dae su 20 de santandria a su 29 de nadale, in Casteddu ant a presentare una seletzione de sas pellìculas de Gianni Amelio, chi at a retzire su Prèmiu a sa carriera intregadu dae su sòtziu culturale L’Alambicco.
Su tìtulu de sa rassegna est La leggerezza dello sguardo. Il cinema di Gianni Amelio. Sas òperas, tzinematogràficas e televisivas, ant a èssere projetadas in sa Sala Aresu in viale Regina Margherita.
A introduire sos filmis a su pùblicu ant a èssere crìticos e espertos de tzìnema che a Fabio Ferzetti, Gianfranco Giagni, Piero Spila, Anton Giulio Mancino, Daniela Marcheschi, Gabriella Gallozzi, Paolo Minuto, Alessandro Macis, Elisabetta Randaccio e Patrizia Masala.
In ocasione de s’ùrtimu apuntamentu, previstu su 29 de nadale in sa Sala Castello de s’Hotel Regina Margherita, a sas sete, in antis de sa premiatzione, su pianista Romeo Scaccia at a ofèrrere unu cuntzertu acumpangende sas immàgines prus importantes de sas pellìculas.
Amelio, 76 annos, est nàschidu in Calàbria e a pitzinnu at bìvidu in Argentina. Torradu a Itàlia s’est dedicadu a su tzìnema, in antis comente crìticu e a cosa comente operadore e agiudu regista.
Faghet s’esòrdiu comente diretore de unu longumetràgiu in su 1983 cun Colpire al cuore, protagonista Jean Louis Trintignant, cun tema su terrorismu italianu.
In su 1992, cun Il ladro di bambini, binchet su Gran Prèmiu ispetziale de sa giuria in su Festival de Cannes.
Cun Lamerica afrontat su problema de s’immigratzione albanesa in Itàlia. S’ùrtima pellìcula, Hammamet, de su 2020, si òcupat de sa figura de Bettino Craxi.
A retzire su prèmiu sos annos passados sunt istados Carlo Verdone, Patrice Leconte, Liliana Cavani, Francesco Rosi, Mario Monicelli, Ettore Scola, Omero Antonutti, Pupi Avati, Carlos Saura, Roberto Faenze e Giuliano Montaldo.
S’intrada est de badas. Organizat su sòtziu culturale L’Alambicco, paris cun su sòtziu La macchina Cinema e su cuntributu de sa Regione Autònoma de Sardigna.
(gianni muroni)
Leave a comment