S’innovatzione torrat a si fàghere intèndere in su coro de su Mediterràneu. Su 18 de làmpadas, sos ispàtzios istòricos de Sa Manifattura in Casteddu ant a ospitare su SIOS26 Summer, s’editzione istiale de su StartupItalia Open Summit.
S’eventu, organizadu dae StartupItalia cun s’agiudu de Innois (sa prataforma pro s’innovatzione de sa Fondazione di Sardegna), si cunfirmat comente su baritzentru tecnològicu pro su Sud Itàlia, mudende su cabu de logu sardu in unu laboratòriu abertu ue startup, investidores e istitutziones s’addòbiant pro torrare a marcare sos cunfines de su possìbile pro mèdiu de su digitale.
Su tema de ocannu, “AI First”, no est petzi unu slogan ma unu decraru de intentos. Est cosa nòdida chi s’intelligèntzia artifitziale est torrende a iscrìere fintzas sas règulas de sa produtividade e de su traballu; e, pròpiu inoghe, su summit atzendet sos rifletores subra de s’ètica e de sa tzentralidade de s’èssere umanu. Non s’at a faeddare petzi de algoritmos cumplessos, ma finamentas de comente sa tecnologia potzat devènnere istrumentu de crèschida atzessìbile e sustenìbile.
Sa Sardigna, gràtzias a un’ecosistema de impresas innovativas in fermentu costante, est protagonista ativa de sa transitzione digitale natzionale, cun sa capatzidade de atràere s’atentzione de sos atores printzipales de su mercadu.
Su programma de s’addòbiu previdit dibatas ispiratzionales cun espertos internatzionales, matsterclass tècnicas e sa finale de su prèmiu “Startup Sarda dell’Anno”. Custa urtima cumpetizione est una vetrina de importu pro sos talentos locales, oferende s’oportunidade ùnica de si connètere cun protagonistas de vàllia in una rete cun ampros iscàmbios de miradas.
Pro su chi pertocat su report “That’s Round”, s’ant a ammustrare sos investimentos in su setore tech de su primu semestre 2026, deliniende sos trend benidores.
Sos traballos ant a cumintzare a sas 10:30 de mangianu.
Gianfranca Orunesu
_________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment