Sàbadu 29, pro sas festas de Sa Die de sa Sardigna, est in programma sa prima de Cast in bronze, curtzumetràgiu cun sa regia de Mario Giua e sa produtzione de Frantziscu Cheratzu pro NOR Films.
Sa projetzione est in programma, a sas 20,00 e a sas 21,00, in sa sala cunvegnos de su Tzentru de comunicatzione e promotzione de su patrimòniu culturale Giovanni Lilliu, in Barùmini. In antis però, a sas 19,00, ddo’at a èssere sa presentatzione de totu sos atores.
Sa pellìcula contat de duos pitzocos de una bidda nuràgica de su 1.200 in antis de Cristos, Ietocor e Iscurti. Mancari siant atirados s’unu dae s’àtera, Ietocor, interpretadu dae Mauro Massa, at a fàghere su gherreri mentras Iscurti, Emanuela Fanni, sa satzerdotissa. Su babbu de Ietorcor est Federico Saba e sa satzerdotissa betza Lia Careddu. Su filmi cheret ammustrare sa realidade de una sotziedade tzivilizada. Sas iscenografias, de Frantziscu Cheratzu e Piero Obinu, sunt istadas fatas cun sa consulèntzia de archeològos. Sas istàtuas chi si bident in s’arena sunt de Salvatore Pinna.
Sa bestimenta e sas armas imbetzes sunt a incuru de Alessandro Atzeni e Sandro Garau, pro The Nuragic Foundry, de su sòtziu Memoriae Milites e de Martina Senis. Sa nave est fata cunforma a sos inditos de Maurizio Frau.
Sa limba impreada est unu protosardu elaboradu dae Mauro Maxia, segundu s’iscenegiadura de Mario Giua Marassi e Andrea Garau.
Girada in Pabillonis, s’òpera at tentu s’agiudu de sa R.A.S. e de sa Fondazione Sardegna Film Commission.
(redatzione)