Nùgoro proponet una sèrie de initziativas pro su carrasegare de ocannu, dedicadas a mannos e piticos.
S’8 de freàrgiu, giòbia de lardajolu, sa Associazione Dietro Mamma Non Siamo-La Casetta organizat, in sos locales de sa crèsia de Santu Giuanne Batista, una festa pro sos pipios, dae sas bator e mesu a sas sete.
Sàbadu 10 est in programma s’isfilada de sas màscaras tìpicas de Sardigna. A sas bator de sero si partit dae pratza Sardegna, pro sighire in bia La Marmora, in bia Majore (corso Garibaldi) e pratza Vittorio Emanuele.
Ddo’at a àere finas mùsica, cun su Dj set de Alberto Oneto, dj Brasil e Beleza Pura, a partire dae sas ses in pratza Vittorio Emanuele.
Su 13, martis de coa de carrasegare, in pratza Vittorio Emanuele, dae sas bator de sero est in programma Pirati e la leggenda del Kraken, cun sos Superanimatori e in prus Dj set cun ispetàculu de tzircu.
A pustis, dae sas chimbe a sas oto, in Piazzetta Largo 4 Marzo, s’at a esibire s’iscola de ballu Magic Dance de Nùgoro.
Sàbadu 17, dae sas chimbe, in pratza Vittorio Emanuele, torra mùsica e ballos cun Spaziodanza, Alberto Oneto e a coa DanyJeey Live 2004, cun Dj Renée La Bulgara.
A sas oto imbetzes in su Teatru Eliseo su Teatro di Sardegna proponet s’ispetàculu anonimasequestri, de Leonardo Tommasi, cun Federico Giaime Nonnis, Luigi Pusceddu, Leonardo Tomasi; dramaturg Sonia Soro.
In prus, semper in su tempus de carrasegare, est in programma un’initziativa dedicada a Gràssia Deledda. Chenàbura 9, in s’Auditorium de s’ISRE (Istituto Superiore Regionale Etnografico) ant a projetare su curtzumetràgiu, seberadu dae su tzìrculu de sos sardos Sarda Tellus de Gènova, Leggende sarde. Contos de ochile, de Luca Albergoni.
Su progetu est resurtadu su mègius in unu cuncursu de sa Provìntzia pro sa tzelebratziones deleddianas. Est sa traspositzione de sos contos publicados dae s’iscritora nugoresa dae su 1894 in sa rivista Natura ed Arte. S’adatamentu in sardu est de Tomasina Albergoni. Su progetu est multimediale e oferit finas un’ebook e sa boghe chi contat de Alessia Argiolas.
A s’operatzione ant partetzipadu puru Roberto Ledda, pro sas immàgines, Davide Sardo e Riccardo Culeddu pro mùsicas e sonos.
(gianni muroni)