Sa presèntzia de sos paras carmelitanos in sa tzitade de Tàtari est bastante antiga. Su primu cumbentu l’aiant fraigadu pro more de una donatzione de su nòbile don Gavino Marongiu Gambella, mortu in su 1610. Essende mortu sena de eredes aiat lassadu sos benes pro sa nàschida de sos cumbentos de sos carmelitanos, de sos mertzedàrios e de sos trinitàrios.
A costàgiu aiant fraigadu sa crèsia puru. Fiat in su tretu in ue s’agatat oe bia Repubblica Romana, in su cuartieri de Santu Zusepe, chi fiat in cuddu tempus foras de sa tzitade.
Pagos annos a pustis però, in su 1637, pro more de ateruna làssida dae parte de Don Francesco De Sena e cun àteras donatziones de fideles, aiant cumintzadu a fraigare unu cumbentu e una crèsia noa, custa borta a intro de sas muràllias.
Sa crèsia fiat istada a bellu a bellu ismanniada, semper cun su dinari de àteras donatziones. Sos traballos sunt sighidos finas a su 1730, ma in sa segunda metade de su de deghennoe sèculos puru b’at àpidu modìficas cun s’agiunta de una pariga de capellas.
Semper in cuddu tempus aiant postu s’arcu chi creat su portigale tra su chirru de sa carrera in ue b’est sa fatzada e su de a fache e chi essit in su chi est oe viale Umberto.
A intro de sa crèsia de Nostra Segnora de su Càrmine, galu oe de sos carmelitanos, s’agatant sa capella de Santa Teresa de su Ninnu Gesùs, nàschida Thérèse Martin, carmelitana frantzesa bìvida in s’ùrtima parte de s’Otighentos e dotora de sa Crèsia, e de Santa Teresa de Gesùs, sa mìstica ispagnola issa puru carmelitana e dotora de sa Crèsia.
B’at finas un’altare dedicadu a su Ninnu Gesùs de Praga. Inoghe puru b’at unu ligàmene istrintu cun s’òrdine carmelitanu bidu ca s’istàtua originale fiat istada regalada a sos carmelitanos iscurtzos de sa tzitade tzeca in su 1628 dae sa nòbile Polissena de Lobkowicz.
(luca foddai)
Leave a comment