Serrare una pizzeria ca b’at “fragu de pizza” est una cosa chi, si non fiat istada lastimosa, aiat fatu a rìere. Est su chi est sutzessu a sa pitzeria “Danese” de Portici pro unu fatu chi, in custas dies passadas est arribadu in tribunale: unu carabineri est istadu tzitadu in giudìtziu cun s’acusa de “tentata violenza privata”.
Segundu sa Procura de Nàpoli, su militare diat àere isfrutadu sa positzione sua pro minetare maigantas bortas a sos proprietàrios de lis serrare s’atividade, e custu intre su mese de santugaine de su 2022 e su de cabudanni de su 2025. S’udièntzia a primu de su dibatimentu est fissada pro su 17 de cabudanni chi benit. Su locale in ue traballant Grazia Ardito e Mario Danese (mugere e maridu), fiat nàschidu gràtzias a sos fundos de “Resto al Sud” de Invitalia.
Totu cun custu, su bisu imprenditoriale de issos duos s’est agatadu a parare fronte a una gama de impedìngios chi, in su ghennàrgiu de su 2025, ant batidu a sa serrada detzisa dae s’Asl pro “pertzetziònes olfativas fastigiosas”. In sinnale de protesta, sos meres ant apicadu unu cartellu chi est diventadu “virale”: “Serrados pro fragu de pizza”. S’avocadu de sa defensa, Maurizio Capozzo at faeddadu, dae su printzìpiu de su provedimentu, de unu acanimentu fora de règula contra a una famìlia cun bator fìgios, chi aiat iscommìtidu totu sos benes suos in custu progetu. Su fatu no s’est firmu petzi intro a sas àulas de giustìtzia, ma nd’at pesadu una dibata polìtica manna.
Sa pizzeria est istada torrada a abèrrere gràtzias a sa mediatzione de su sìndigu de tando, Vincenzo Cuomo, iscadenende un’iscòntriu tostu cun Carmela Rescigno, a cussu tempus presidente de sa Commissione regionale anticamorra. Oje, cun sa tzitatzione in giudìtziu de su militare, sa chistione intrat in sa fase de prus mannu importu de su protzessu pro berificare si, in palas de cussas pressiones e de sos cuntrollos istrintos, b’at àpidu un’abusu de podere cun sa punna de serrare s’atividade cummertziale de sos Danese.
Bobore Taras
__________________________________________________________________________________________________________
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment