Capitale culturale. Artìculu determinativu maschile

Capitale culturale. Artìculu determinativu maschile

Pro more de sa cuntierra chi pertocat sa collocatzione de is Gigantes de Monte Prama est torrende a emèrgere sa chistione de una Sardigna cun biddas e tzidades in pòrfia. Intre sas primas ddoe nd’at prus de una chi a su presente est Borgo autentico d’Italia e intre sas segundas ddoe at chie boliat èssere capitale culturale de Europa (Casteddu) o de Itàlia (Nùgoro), ma non de Sardigna. Ma, in sa Sardigna de is duos cabos, de is duos giornales (chi però est mègius chi abarrent partzidos a garantzia de su pluralismu), de is duas universidades, a ddoe diat bòlere una capitale culturale? A dd’àere, netzessàriu est? Su de non dd’àere est sa cajone de una limba mala a essire a campu comente modellu reconnotu in intro e in foras, o su de non reconnòschere unu modellu linguìsticu est sa còntiga pro non bòlere una caput Sardiniae? In carchi giassu podimus lèghere chi Casteddu diat dèpere èssere sa capitale nostra ca est sa sede de sa polìtica, ca ddoe at prus gente (sa chistione anagràfica est una costante in s’allega linguìstica), ca ddoe bivet totu sa Sardigna in cue. Ma leghimus finamentas chi Casteddu at rinuntziadu a èssere capitale culturale de Sardigna. E comente? Casteddu no est un’entidade ùnica. Pro seguru in Casteddu e in sa realidade metropolitana sua non ddoe at una burghesia natzionale chi gasi potzat èssere cramada. E sa polìtica? Sa chi fiat sa provìntzia de Casteddu aproveit un’istandard pro ortografia, fonètica e morfologia de cussos tretos ebbia e pro chi in Sardigna ddoe apat duas normas. Tando, in antis de faeddare de sa capitale culturale diat èssere pretzisu a faeddare de su capitale culturale, de cussu agregadu de connoschèntzias e de valores chi bolet trasmìtidu a is generatziones imbenientes. S’iscummissa nostra pro un’identidade natzionale progressiva e mediterrànea. Cunforma a custa punna, Casteddu nche podet lassare a banda cussa rinùntzia e contribuire a fraigare sa natzione. Movende dae sa limba e apropiende·si de s’idea de limba comuna (mancari non custa) pro totu is sardos.

Màuru Piredda

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *