Una campagna eletorale in istiu in Itàlia non si fiat mai connota. E no at a èssere mancu fàtzile, ca sa gente cheret andare in vacàntzia, a s’ispàssiare a pustis de duos annos de peleas pro neghe de sa pandemia, e non nd’at gana de pessare a sas cuntierras polìticas.
Sos candidados però sunt giai traballende e sunt prontos a cumintzare sos giros de propaganda in Sardigna puru.
Su primu a arribare at a èssere Matteo Salvini, su 12 de austu a Terranoa. Deretu a pustis l’ant a pònnere fatu totu sos àteros polìticos de sos partidos chi si l’ant a gherrare, pro sos 600 postos in Parlamentu, su 25 de cabudanne, die de sas eletziones polìticas.
Intro su 22 de austu si depent presentare sas listas. Dae tando sos candidados sardos ant a dèpere traballare cun contivìgiu pro si fàghere elèghere in sos 11 sègios de sa Càmera, 4 de assignare cun su sistema uninominale, e sos 5 de su Senadu.
Sa modìfica costituente, difatis, at privadu sa Sardigna de 9 rapresentantes rispetu a su 2018, cando sos sègios fiant 25.
Mariantonietta Piga