Sa rivista Camineras at tzelebradu sos binti annos de vida. L’at fatu in sos locales de Il vecchio Mulino, in Tàtari.
A fàghere de meres de domo sunt istados sos redatores Paolo Mugoni, Ninni Tedesco e Daniela Piras.
Paolo Mugoni, chi paris cun Ninni Tedesco, Antoni Buluggiu, Aldo Borghesi, Salvo Zedda, Mariolino Murtas e Cristiano Sabino, at fundadu su giornale, at fadu unu bilàntziu de custos primos binti annos ammentende puru ex redatores e ex collaboradores, chi in su tempus ant dadu unu cuntributu, mancari mìnimu, a sa càusa.
Ninni Tedesco, chi est diretore responsàbile, at faeddadu pròpiu de militàntzia editoriale, bidu chi totu sos chi faghent bìvere Camineras lu faghent de badas, comente volontariadu.
Ant dadu unu cuntributu puru Alberto Pinna, collaboradore de Il Corriere della Sera, chi cun sa TAS imprentaiat su periòdicu, e Pier Giorgio Pinna, giai giornalista in su cuotidianu locale e in sa Repubblica, chi ant afrontadu su tema de sa pèrdida de credibilidade de s’imprenta sarda chi at tentu comente efetu sa pèrdida de còpias, cun sas duas testadas printzipale, sa de Tàtari e s’Unione de Casteddu, chi sunt a suta de binti mìgia còpias sa prima e de trinta mìgia sa segunda.
Daniela Piras, chi a s’atividade de giornalista unit sa de iscritora, at espostu sos problemas rapresentadu pro sos free lance o in ogna modu pro sos chi traballant pro testadas minores, de fàghere su mestieri issoro, rapresentados massimamente dae sas cunditziones econòmicas isfavorèvoles, chi cunditzionant in negativu sa possibilidade, pro nàrrere, de fàghere inchiestas in loco.
A sa fine b’at àpidu unu dibàtidu animadu dae su pùblicu presente subra s’istadu de s’informatzione in Sardigna.
Camineras dae carchi annu est publicadu dae s’editore Condaghes. Propietàriu de sa testada est su Sòtziu de sos Sardos.
(luca foddai)
Leave a comment