Nos semus lassados cun su càmbiu de s’ora. Bene, inoghe totu a norma. In Lìbanu nono. Comente mai? Movamus cun òrdine. In su paisu mesu orientale s’ora la mudant a parusu s’ùrtima domìniga de martzu. Comente in Itàlia. E non comente in Itàlia ebbia. Ma ocannu su primu ministru Najib Mikati at disinnadu de lu fàghere su 20 de abrile. Cun su resurtadu chi, però, in medas sunt sos chi non sunt rispetende custa detzisione. Duncas est comente chi in Lìbanu, a su presente, b’apat duos oràrios: su solare e su legale. Su proite est ca Mikati aiat annuntziadu custa cosa petzi gioja, est a nàrrere a pagas dies dae su càmbiu traditzionale. Non bi diat àere motivatzione ufitziales, ma b’at unu vìdeu cun Mikati matessi chi faeddat cun su presidente de su Parlamentu e s’ipòtesi – movende dae cussa allega – est chi sa cajone de custu sèberu siat de màdrighe religiosa. E sighende su calendàriu, mescamente su de sos fideles islàmicos, sos contos diant torrare. In cussas dies finit difatis su mese sacru de su Ramadam (s’annu coladu finiat su 2 de maju) e, l’ischimus, sos musulmanos podent chenare petzi a pustis de s’interinada. Unu càmbiu de oràriu como cheret nàrrere a los fàghere mandigare prus a tardu a pustis de su geunu, pagu prus o mancu a sas 19 e no a sas 18. Su fatu est chi sos cristianos maronitas sunt majoria in su paisu; sunt narende chi Mikati at pigadu custu disinnu sena nde faeddare in antis e sena pigare in cunsideru sos istandard internatzionales. Duncas b’at chie est adotende s’oràriu legale: organizatziones, iscolas cristianas, partidos, televisiones. Cosa diferente pro sos musulmanos chi, pro sos motivos inditados, sunt sighende sos inditos noos. Su càmbiu de s’ora, chie aplichende·lu chie nono, est mustrende unu paisu semper prus partzidu cara a unu crisi sotziale e finamentas polìtica (galu est sena Presidente de sa Repùblica).
màuru piredda
Leave a comment