A pustis de 37 annos sa Regione Sardigna, cun unu votu a s’unanimidade, sèberat de cambiare su sistema de Protetzione Tzivile, chi fiat firmu dae su 1989, cheret nàrrere chi fiat espressada de un’àtera època. De custa riforma bi nd’aiat bisòngiu ca in totu custu tempus su clima si nch’est avolotende e sos arriscos e sos trastes chi si podent impreare sunt diferentes meda.
In custos ùrtimos annos, bi sunt istados duos tziclones, Harry e Oriana, chi ant fatu dannos maicantos a su territòriu, pro non faeddare de iscotzuladas de ràndine a s’ispessada, bentu forte, sicagnas a sighidura e fogos in sos padentes. E tocat de bi annànghere finamentas sos perìgulos ligados a sas fainas umanas, comente sa possibilidades de gherras o de atacos de su terrorismu de cale si siat bandera, e sas emergèntzias sanitàrias che a su Covid.
Dae s’àtera banda sa tecnologia est crèschida in una manera ispantosa: intellighèntzia artifitziale, incùngias de datos climàticos e metereològicos, drones e telecomunicatziones noas. Ainas chi si postas in paris podent ampare s’ìsula a dae in antis de s’apretu chi podet bènnere.
Sa lege, de 37 artìculos, acontzat a sas netzessidades de s’ìsula su Còdighe de sa Protetzione tzivile natzionale de su 2018. Sa riforma intritzat una rete intre sa Regione, sas Provìntzias e sas Comunas, cun carchi istruturas de s’Istadu inditadas dae sa lege. Sa punna est cussa de fraigare una Protetzione tzivile chi istet a curtzu a sas comunidades, mescamente cussas prus a tesu dae sas tzitades o collegadas male, chi in acontèssidas graes diant pòdere abarrare assoladas. Sa noa prus importante però est sa nàschida de un’iscola pro sos chi faghent parte de sa Protetzione tzivile pro imparare e annoare tècnicas de amparu de sa populatzione e gestione de sas crisis.
Pro su chi pertocat sos trastes noos sunt duas sas novidades. At a nàschere su SIPC unu sistema pro sustènnere e cambiare sos pianos de gestiones, sighende sos datos regortos a lenu a lenu: una manera pro aprontare su territòriu a sos eventos prus assustosos. Sa Protetzione tzivile at a impreare su RRR una genia de ràdio chi resesset a agatare semper sinnale e barigare sos istorbos prus mannos, gasi dae istransire sa possibilidade de biddas aoradas.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment