Unu de sos poetes prus connotos e istimados de sa poesia tataresa est Pompeo Calvia. Sa produtzione de s’autore no est istada publicada de su totu. B’at galu materiale inèditu.
Su nebode de Calvia, Antonio Mario Siotto, mortu dae pagu, fiat su depositàriu de s’òpera de su parente e aiat espressadu sa volontade de bìdere publicadas totu sas creatziones literàrias de Calvia in possessu suo.
In s’Archìviu Istòricu de Tàtari b’at àpidu sa presentatzione de Pompeo Calvia (1857-1919). Prospettive di studio e valorizzazione. Le gobbule ritrovate.
In sas cartas de Siotto difatis b’aiant finas custos cumponimentos tìpicos de sa tzitade chi a su sòlitu si cantaiant in su tempus de sas festas de nadale.
A faeddare de custu ritrovamentu est istadu s’architeto Sergio Ticca, curadore de su fundu Siotto-Calvia. Paris cun issu ant partetzipadu sa nova a sa tzitadinàntzia sa diretora de s’archìviu Carla Merella e Simonetta Castia, de su tzìrculu culturale Aristeo e editore de Mediando, chi at presentadu una publicatzione cun duas gòbbulas in italianu, raridade custa, bidu ca sa limba impreada pro custa genia de cantu fiat semper cudda turritana.
Una s’intìtulat I sette candelieri e s’àtera La casa di Michele Zanche.
Da grandi occhi neri neri
La Madonna è circondata
E da sette candaleri.
La Madonna è coricata
Nel suo letto a baldacchino
Tra profumi d’incensieri
Nepitella e gelsomino
De gasi cumintzat su cumponimentu dedicadu a sos candeleris.
S’importàntzia de Calvia in sa cultura populare tataresa est manna, pro su valore literàriu e pro èssere istadu testimòngiu diretu de unu tempus chi fiat passende pro semper, in antis de èssere ingurtu dae sa modernidade.
Sa presentatzione fiat patrotzinada dae sa Comuna de Tàtari, dae sa Regione Autònoma de Sardigna e dae sa Fondazione di Sardegna. At introduidu s’assessore comunale a sa Cultura Laura Useri.
(luca foddai)