Sos vocales de WhatsApp sunt oramai una de sas formas de comunicatzione intre sas prus impreadas. S’optzione est invasiva a su puntu de mudare s’impreu telefònicu traditzionale, non leende su logu de sos messàgios in segreteria telefònica ebbia ma finamentas su de sas cramadas. Cun custu tipu de messagìstica torrat a bìnchere s’oralidade ma sa psicosi ingendrada sas dies coladas cun carchi messageddu orale nos ammustrat chi su “vocale” no est intre unu mitente e unu destinatàriu ebbia. Sa boghe chi at annuntziadu isciòperos e fruniduras in mancu est lòmpida a una platea manna de origras che chi esseret istada una boghe de speaker radiofònicu. In una paràula, comunicatzione broadcast. E in medas, bucamindotos, b’ant crèidu isboidende parastàgios in sos mercados e ponende·si in fila pro prenare sos serbatojos de sa màchina issoro. Però si abbaidamus sas allegas de sas bullas nostras de Facebook paret chi nemos de nois apat pigadu parte a custos assàchios. Paret chi nemos o belle nemos b’apat crèidu. Su prus chi si leghet est una crìtica corale contra a custos cumportamentos. Custu cheret nàrrere carchi cosa. Chi si WhatsApp nos at mustradu sas potentzialidades suas de màdrighe broadcasting, Facebook nos ammentat chi, algoritmos o mancu, nche semus in intro de su fenòmenu filter bubble e chi duncas nos agradat a èssere inghiriados dae gente chi la pensat che a nois. Nos agradat a nos ispoddigare pari pari e a s’ispissu b’at chie intre sas optziones “rimuovi dagli amici”, “seleziona il pubblico”, “non seguire più” nch’istèsiat su chi no est allineadu a su pensu suo. Ma custu istesiare a gusariosos a beru nos faghet? Forsis diat èssere tempus de chircare de cumprèndere comente si movet sa majoria de sa gente chi nch’est in foras de sa bulla nostra; forsis diat èssere ora de cumprèndere chi non sunt sos pagos like chi pigamus chi l’ant a mudare a custu mundu.
màuru piredda
Leave a comment