Su giùighe de Buenos Aires Alejandra Abrevaya at nominadu eredes universales de María Kodama, sa viuda de s’iscritore argentinu Jorge Luis Borges morta in su mese de martzu de su 2023, sos chimbe nebodes de sa fèmina. Como sos deretos de autore de s’òpera borgesiana sunt sos issoro finas a su 2056.
Su magistradu at finas bogadu una mesura cautelare chi istabilit chi sos benes chi aparteniant a Borges e chi sunt cunsiderados de importàntzia artìstica, che a sa biblioteca personale o sos documentos e iscritos suos, non si podent mòvere ca sunt cunsiderados patrimòniu culturale de sa tzitade de Buenos Aires.
Sa mesura est istada leada a pustis de una petitzione de s’ex senadore de su partidu Propuesta Republicana Federico Pinedo.
Sos eredes e sa fundatzione internatzionale Jorge Luis Borges, creada dae Kodama in su 1988 e cun sede in Buenos Aires, ant annuntziadu ca ant a fàghere ricursu contra a sa detzisione de su tribunale.
S’iscritore argentinu aiat lassadu comente ùnica erede a María Kodama, chi pro annos est istada sa cumpàngia sentimentale sua e sa segunda mugere, cojuada pro procura pagu meses in antis de mòrrere, in su 1986. Sos duos si fiant connotos comente maistru e dischente e in unu segundu momentu sa relatzione fiat bènnida a èssere de iscritore e segretària e in fines de isposos.
Sa detzisione de su magistradu torrat a dare unu caràtere conflituale, finas a pustis mortu, a sa relatzione chi s’autore teniat cun sa pàtria sua.
Sos raportos fiant malos massimamente cun su regime peronista. Ma finas durante sa gherra pro sas Falkland-Malvinas si fiat opostu a s’initziativa de sos militares argentinos. Pagu in antis de mòrrere aiat istabilidu sa residèntzia in Ginevra e in ie aiat chertu a dd’interrare. In su 2009 un’initziativa peronista de nche leare sos restos mortales a su campusantu de sa Recoleta, in Buenos Aires, fiat istada blocada dae sa viuda.
(gianni muroni)
Leave a comment