Su 24 de santandria, in su Tecnopolo de Bologna, ant inauguradu su supercomputer Leonardo.
Classificadu su de bator in sa lista de sa Top500 de sos carculadores prus lestros in su mundu, est ospitadu dae CINECA e finantziadu dae EuroHPC JU in pare cun su Ministeru de s’Universidade e de sa Chirca.
Leonardo at una potèntzia de càrculu ispantosa e podet esecutare prus de unu milliardu de milliardos de operatziones cada segundu. Su manufatu tecnològicu de 240 milliones de èuros est a su servìtziu de sa chirca (astronomia, fìsica, meteorologia) e at a permìtere aplicatziones noas in setores comente s’intellighèntzia artifitziale, s’energia rinnovàbile, sa meighina personalizada, sas previsiones meteorològicas e sos cambiamentos climàticos, genòmica etc.
Su supercomputer – uno de sos tres sistemas “pre-exascale” de s’impresa comune EuroHPC Joint Undertaking – ant cumintzadu a l’assemblare in su mese de trìulas; tenet 155 rack (armàrios prenos de protzessores) e 5000 nodos, e l’ant atzesu in santugaine. S’inauguratzione at bidu sa presèntzia de su presidente Mattarella.
Sa metade de sa potèntzia de càrculu de Leonardo at a èssere a disponimentu de sos istitutos de chirca e de sas universidades, e s’àtera metade est destinada a sos chircadores europeos. Gràtzias a sas caraterìsticas islacanadas de custa creatzione, at a èssere possìbile finamentas a cumprèndere mègius sos maremotos e sas erutziones vulcànicas.
Gianfranca Orunesu
(foto Wikimedia)
Leave a comment