Cuncurrèntzia in vista pro Elon Musk e Mark Zuckerberg. Sa prataforma de microblogging Bluesky s’at lassadu a palas sa fase beta a nùmeru serradu e dae como in susu est a disponimentu pro totu cantos. Sunt giai tres milliones sos utentes intre sos chi l’impreant in su web e sos chi s’ant iscarrigadu s’app in sos sistemas operativos mòbiles Android e iOs. S’annùntziu de Bluesky est betzu de un’annu, de su mese de freàrgiu de su 2023, ma s’aviu de su progetu est de su 2019, cando s’ideadore suo Jack Dorsey fiat galu Ceo de Twitter.
E dae su social chi teniat su pugioneddu asulu paga diferèntzia b’at. Sos utentes podent iscrìere post curtzos cun fotografia, cumpartzire, ammudare e blocare àteros contos, sighire àteras persones e bìdere sos agiornamentos in sa pàgina. Sa diferèntzia est in sa mancàntzia de unu controllu tzentralizadu (su protocollu est open source). Chi però est bilantzada dae sa presèntzia de un’iscuadra de moderadores pro averguare ora cun ora su rispetu de sas règulas de sa comunidade.
De prus, est possìbile a aprontare aposentos de allega personalizados e a personalizare s’andanta de sos post in bacheca, non in òrdine cronològicu ebbia. A su presente non b’at messagìstica privada intre sos utentes (cosa chi b’amus in àteras prataformas rivales de microblogging). Bluesky si presentat a pustis de 12 meses de annestru cun unos cantos puntos de fortza ma non si podet galu cumprèndere cantu s’at a isvilupare. Tocat fintzas de abbaidare sa àteras prataformas. Pro nàrrere, Threads nch’est in sos 10 milliones de utentes cun una mèngua de s’80% dae cando lu bogheint a campu su mese triulas coladu. S’iscummissa est in sa mesa e su passu imbeniente est su de ativare in manera graduale su protocollu At pro isvilupadores “tertzos”. Cosa chi, in teoria, diat pòdere permìtere a chie si siat s’aprontu de unu server cun règulas pròpias.
Gianfranca Orunesu
Leave a comment