BIDDANOA. “Chenamos in carrela” at lòmpidu degheoto annos e, in s’editzione 2026, at àpidu un’àtera resessida manna. Dae su 4 a su 6 de austu, sos turistas sunt acudidos a fiotu pro tres dies de mùsica, de cultura e màndigos de sa traditzione. Mescamente pro sa chena sotziale in carrela, s’ùrtima die in su coro de su tzentru istòricu. Filas longas in carrela Tàtari e piatza Generale Casula ant acumpangiadu unu sero de sabores biddanoesos, dae sos “ciciones cun ghisadu” a sa petza arrustu, sa melinzana impanada e su casu berbeghinu e cagnulari.
In sa serada presentada subra su palcu dae Pinuccia Sechi, Piatza Casula est istada teatru de sos ispetàculos de sas iscolas de ballu de Sardigna e, posca, de sos ballos pro totu, cun sas armonias de sa fisarmonica de Antonio Tanca.
“Chenamos in carrela” est ammaniadu dae sa Proloco de Biddanoa, finantziadu e patrotzinadu dae s’Amministratzione comunale, e faghet parte de su network “Salude&Trigu” de sa Càmera de Cummèrtziu de Tàtari.
Biddanoa, resessida manna pro "Chenamos in carrela" chi lompet degheoto annos
