“Riu mannu. The Lan(d)guage Grabbing” de Micheli Ladu. Òpera publicada dae NOR Edizioni in su 2019, colletzione ‘Isteddos’
A in antis de fùrriare a domo, dae cussa pratza, unu contoniende cara a susu e s’ateru recorvende conca a bassu (Lisandru semper a bassu), cada merie, cando bi fiat tempus bonu, si saludaiant gioghende una murra. Una e bastu a su bintunu. Ma si nche istentaiant meda e su sole fiat giai ingalende in segus de su monte, cun s’iscurigada colorada a costàgios, tando unu de sos duos, a pustis castiadu in cara a s’àteru, faghiat s’ogrupuntu boghende sa manufica, pinnigaiat sas lavras in mesu de dentes boghende unu sonu, una casta de “Vhsfu!” belle gruspende che a sas tzias mannas cando irrocaiant a calicunu cun ambas manos abertas e li naraiat: «Una sica, lè!» fuende-si-nde a sa lestra. E s’àteru tando frastimmende: «Puh, lè, anco t’apìtzighet a tue!». E curriant recuende in guturinos e iscaleddas cun sos lantiones allutos acumpangende-los in s’interinada.
Totu aiant fatu paris. Ma sa cosa chi los aiat aunidos de prus fiat istadu s’annu chi aiant fatu su militare.
Giai dae cando aiant mòidu pro sa bìsita de leva.
Leave a comment