Bìculos de literadura #4

Bìculos de literadura #4

“Riu mannu. The Lan(d)guage Grabbing” de Micheli Ladu. Òpera publicada dae NOR Edizioni in su 2019, colletzione ‘Isteddos’

Badore e Lisandru si connoschiant dae pitzinnia, aiant fatu s’asilo e totus sas àteras iscola paris. Ma non petzi sas iscolas. Totu aiant fatu paris. Arreppeddadu in sos àrbores, segadu pantalones in su ruu, isfrasigadu ghenugros in terra, iscàrfidu sas ancas chi aiant curtu in mesu de su pistiolu, furadu mela dae sa mata de Zuannicu Peiscurtzu, giogadu a tene-tene, imboladu pedras cun su tiralàsticu a sos nidos de pugione, cassadu tziligherta trunchende-li sa coa, istrumpadu, segadu bidros de ventanas cun sa botza, artziadu a muros cun in pitzu ampullas segadas e intzimentadas, bidu botzas isperradas in duos e postas che papalina in conca dae su mere de sa ventana, carotadu in Carrasegare, ammaniadu istrisineras in s’àstragu de sos guturinos prus in pigada, balladu in su grupu de ballu e cantadu a tenore (Badore contra, Lisandru bassu), sonadu in unu grupu metal (Badore chiterra, Lisandru semper bassu), abboghinadu in sos cuntzertos, giogadu a fùbbalu in Pratza de Crèsia, basadu sa matessi fèmina (ma in tempos diferentes), cotu porcheddu in sos ispuntinos, cotos che porcheddu bufende binu coghende porcheddos in sos ispuntinos, iscutu in carchi festa, addovoscados in carchi festa (ma su prus chi nde colliat fiat Badore). 

 

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *