“Riu mannu. The Lan(d)guage Grabbing” de Micheli Ladu. Òpera publicada dae NOR Edizioni in su 2019, colletzione ‘Isteddos’.
Lisandru.
Chiziumbrosu, conchispilidu, matimannu. Barba che parde. Ogrigàtinu, cun ogros mèscrinos e birdes che fundale de mare. Truncheddinu ma lestru che lèpore. Limbidurche ma tzarreri che a tres gomares. Cun in conca semper unu capedditu nieddu, ruju e biancu de sos Chicago Blackhawks (e cantas bortas aiat peleadu in tzilleri pro ispiegare chi s’agataiat finas unu astore nieddu in su mundu) cun una cara de indianu acante a sa bisera. Tatuàgiu de s’iscuadra sua in su coddu, e unu cun disinnos tribales africanos, pintaderas e una Giana mesu ispollinca in s’àteru bratzu. Aneddu mannu in sa manu dereta, gasi mannu chi pariat unu missennore rapper americanu, e una loritzina minore minore in un’origra.
Custu fiat Lisandru.
Leave a comment