Bìculos de literadura #12

Bìculos de literadura #12
Su collidore de biscu (El collidor de vesc) de Pau Urgell.
Tradutzione de Francesc Ballone.
Òpera publicada dae Condaghes in su 2012, colletzione “paberiles”.
Sa lughe brillaiat in cuddu logu de una manera diferente. Podiat pàrrere sa matessi lughe, su matessi fluore emanadu dae su matessi astru pro more de sas matessi isperas. B’aiat però carchi cosa de ispetziale in sa pertzetzione de sos volùmenes, colores, tonalidades de cuddu logu, creada dae sa manera chi sa lughe si bi ghetaiat. Fiat comente chi cuddas carenas etotu retzerent un’ispètzia de lughighedda, lèbia lèbia, però a su matessi tempus gasi manna chi si rifletiat in cudda àera comente chi esserent issas matessi a la ghetare, cudda lughighedda. Un’efetu ùnicu, creadu non dae sa lughe ebbia, ma finas dae sa disposta in cuddu giassu de ogni cosa in s’acàpiu cun ogni àtera cosa, e finas in s’acàpiu cun sa matessi lughe. B’aiat una proportzione pretzisa in ogni ispuntone, una distàntzia otimale intre totu sas lìnias chi definiant su paesàgiu, un’iscuta de tempus pretzisa intre sa lughe e sa distàntzia de ogni cosa, un’amprària giusta de sas umbras ghetende·si a pitzu de s’erba, una mannesa pretzisa pro ogni volùmene, una finesa intradora de totu su chi si podiat bìdere a intro de cudda lughe de manera belle incorpòrea, cun un’assèntzia cumpleta de tensione o peleas, e pariat chi sa lughe iscurreret a traessu de ogni corpus, e chi sos corpus iscurrerent a traessu de ogni molècula de lughe.  Su collidore de biscu caminaiat peri cuddu ambiente, aturdidu, abbaidende in ogni diretzione, abbengaladu dae totu sas visiones chi l’inghiriaiant. Totu in unu arribbesit a su cumintzu de unu bagantinu mannu aberende·si in tundu, trassende unu chircu perfetu cun pinnas de roca lisa artas meda e ammantadas de èdera. Abarresit a buca aberta cuntemplende cudda cosa manna manna e desemprada artziende·si solenne pròpiu in mesu de cudda lascura.
Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *