“Riu mannu. The Lan(d)guage Grabbing” de Micheli Ladu. Òpera publicada dae NOR Edizioni in su 2019, colletzione ‘Isteddos’.
Badore si nche fiat sètzidu in unu de sos truncos nodosos chi nch’aiat serradu dae pagu cun sa motosega noa, suta de unu chelu annuadu, galu suorende e abbaidende unas cantas matas de mudegru mesu allatzanadas. Paris cun sas pedras prenas de lana de monte, cussas tupas fiant sa làcana de su sartu suo, ma fortzis fiant fintzas una casta de làcana intre de s’ierru acante a acabare e su beranu chi fiat intrende. Si fiat bortadu cara a su furgoneddu chi teniat sas ispondas totu intortigadas e mesu pungiadas, gasi acoconeddadas e prenas de arroìngiu chi si nch’aiat mandigadu agiumai totu su colore nieddu de sa vetura, in sos pìtzulos e in sas portieras. Belle che a sa mistra sicada cando si nche ispìtzigat dae sas pinnas de muru. Comente chi esserent fògias atonginas. Aiat leadu unu tzàpulu de lentzolu betzu e mesu purdigadu chi toloiat in intro de sa tasca a sa tedesca, in colore birde militare ispintadu, ue chistiat sos trastes de sa motosega noa; craiteddas inglesas, arrodadores, framas e cadenas, rodantzas e dados de bullone. Ma mescamente tzàpulos. A cussu chi teniat in manos nche l’aiat iscotuladu totu sa burrumballa e s’aiat assutadu sa cara pinnighende sa conca a in antis pro si pasare, ponende sos cùidos in sos ghenugros. Un’acantzadedda de sonnu si l’aiat istètia finas fata ma depiat acabbare galu su traballu, e comomai fiat abarradu a sa sola. Deretu a pustis aiat pesadu sa conca pro s’abbaidare torra cussa vetura.
Leave a comment