Su 1 de abrile de su 1976 est die nòdida. Una data istòrica, in su mundu de sos computadores, chi marcat s’evolutzione tecnològica. Tres pitzocos, Stephen Gary Wozniak, Steve Paul Jobs e Ronald Gerald Wayne fundeint sa Apple in unu garage minoreddu de Los Altos, in Califòrnia. Wozniak cumintzeit unu progetu destinadu a devènnere su computadore Apple I. Sas peculiaridades? Preju baratu, programmàbile e cun pagos chip. Sigheit iscriende una versione de su limbàgiu de programmatzione BASIC (Integer BASIC) pro su chip 6502 de MOS Technologies e, pagu tempus a pustis dae sa nàschida de sa sotziedade noa, Apple I debuteit in sa cunferèntzia de s’Homebrew Computer Club de Palo Alto.
Gasi, su Apple I teniat su chip 6502 de 1 MHz e una RAM de 8 kb ma, a diferèntzia de sos àteros computadores de s’àmbitu hobbysticu, lu bendiant giai assembladu in s’ischeda madre – sena case e sena perunu àteru cumponente – e non comente kit de montàgiu. Tocaiat de buscare finamentas s’ischermu, sa tastiera, s’alimentadore e s’istrutura esterna.
Wozniak e Jobs resesseint a bèndere 50 Apple I a su Byte Shop, cadena informàtica istadunidense; su proprietàriu, Paul Terrel, ordineit sas creatziones a 500 dòllaros s’una, ma a una cunditzione: sos computadores depiant èssere cumpletos de totu sos atzessòrios. Sende chi, a cumintzu, s’idea fiat sa de produire e bèndere petzi sas ischedas lògicas, custa rechesta pongeit abbolotu intre sos sòtzios e Wayne detzideit de tzèdere su 10% suo a Wozniak e Jobs. Gasi, in su garage de Steve Jobs cumintzeit s’assemblàgiu de sos computadores pro satisfàghere sa rechesta de Terrel. Luego s’auneit una tertza persone cun ruolos imprenditoriales: semus faeddende de su mànager Clifford Makkuula Jr. Gràtzias a s’agiudu suo, Apple devenneit Apple Computer Inc in su mese de ghennàrgiu de su 1977.
Ses meses a pustis, avieint unu progetu nou, Apple II: un’ evolutzione de Apple I. Su computadore teniat un’istrutura esterna de plàstica, s’ischeda lògica e una gràfica a colores. Sa Ram la potentzieint: dae sos 8 a sos 12 kb. Su logo nòdidu cun sa mela mossigada nascheit in cussos tempos: sa peculiaridade sua fiant sos colores de s’arcu de chelu a s’imbesse.Apple II lu produeint fintzas a su 1980 a pustis de àere bèndidu prus de unu millione de petzos e l’ammentant comente s’ùnicu a gestire VisiCalc, so primu fògiu de càrculu.
Gianfranca Orunesu
(Foto dae WikiMedia Commons)
Leave a comment