Banderas e pedras pro sa sanidade sarda

Banderas e pedras pro sa sanidade sarda

In su matessi tempus chi Solinas decraraiat s’inghitzu de sos traballos pro sos ispidales noos, impostende sa prima pedra de cussu de Santu ‘Engiu; in Nùgoro si regolliat gente meda in sas carreras pro si chesciare de sa situatzione de sa sanidade in Sardigna. Non depimus ismentigare chi pustis cras bi sunt sas eletziones e siat dae un’ala siat dae s’àtera b’at polìticos.

Solinas e Nieddu sunt proende a cumbìnchere sas comunidades chi su disacatu de sa sanidade sarda, ghiada dae sa Lega, non est neghe issoro, ma antzis chi andat totu bene e chi in su benidore sas cosas ant a megiorare puru. Sos sindacados e sìndigos sardos ant prenadu sa tzitade pro ammentare chi non b’at trenu e sunt in arriscu puru sos fundos de su PNRR e chi s’ispidale de Nùgoro, e àteros cun isse, sunt sufrende problemas mannos.

Totu custa movitia est craru chi est in bidea de su 25. Ma si in Nùgoro no est dae oe chi sunt falende in pratza pro si fàghere intèndere (ammentamus su comitadu pro amparare s’ispidale de Sòrgono), su Presidente, no est gasi afitianadu a abèrrere fràigos o a s’impinnare pro megiorare sa situatzione de sa sanidade de su logu.

(redatzione)

Leave a comment

Send a Comment

S'indiritzu email tuo no at a èssere publicadu.