S’àtera die leghende su giornale apo agatadu custu artìculu e mi so apistighingiadu. De su chi narat, sende chi siat beru, paret chi sos istantziamentos postos a cùrrere dae sa Regione siant impreados a manera curiosa.
Imbetzes de limba sarda si faghet ballu sardu. No andat bene. Nois de su CSU e de Limba Sarda 2.0 l’aiamus naradu chi sas polìtica linguìsticas pariant barigadas dae cussas folklorìsticas. No at a èssere custu su casu e de seguru b’at paritzas atenuantes.
Est un’iscola de s’infàntzia in ue finas su giogu e finas su ballu podent èssere mèdios de imparu de sa limba. B’at un’ operadore de gabbale chi ischit su sardu e podet faeddare in sardu. E però… E però….
Sende chi totus faghent apellos a s’unidade, a sa condivisione e a sa paghe, mi permito de sinnalare una crititzidade chi mi paret dàbbile. Ispero chi sa Regione la retzat. So seguru chi sos ufìtzios, chi sunt capatzos, ant a essere giai intervènnidos. Ca est fata non pro fàghere dannu, ma pro megiorare. E chi deo sia comente mi cherent: collaborativu. In paghe.
E tando averguade sos progetos. S’esperièntzia mi diat gighere a averguare bene ca s’arriscu de rùere in su folklore e in su folklorìsmu est mannu. Cussu tìtulu de giornale acostagiadu a sa lege de su sardu veicolare in oràriu curricolare faghet dannu. Sa neghe, che a semper, est politica, ca su messàgiu a sa gente est oportunìsticu, folklorìsticu e de “discussionismu a oltranza”.
Torro a nàrrere: mancari no est gasi, totu andat bene, su profilu est cussu de un’iscola chi ponet in fatu a totu sas protzeduras europeas de imberghidura linguìstica, mancari su giornalista no at cumpresu bene…
Ma s’arriscu de fàghere folklore e no aprendimentu linguìsticu est mannu. Ispero chi sa letzione de ballu siat in sardu, ca forsis gasi tenet unu sentidu e unu pro ite didàticu, ca si in àteros logos, a s’imbesse, la faghent in italianu, non diat serbire a nudda.
Paghe, unione, amore…
(dir)
Leave a comment