Babel Film Festival 2021

Babel Film Festival 2021

Est giai pùblicu su bandu pro sa de sete editziones de su Babel Film Festival, dedicadu a sas minorias lingusticas.

Sos diretores artìsticos Antonello Zanda, Tore Cubeddu e Paolo Carboni faghent a ischire chi a prus de sas projetziones ddo’at a àere master class, atopos cun espertos de tzìnema e de minorias linguìsticas e cuntzertos.

Sa setzione ufitziale est dedicada a sos filmis faeddados nessi a su 50% in una limba minoritària. In prus est prevista una setzione collaterale, pro sos chi tenent una partzentuale de limba minoritària prus bassa de su 50%.

Sas categorias sunt pro su mègius longumetràgiu, documentàrios incruidos, prus de 45 minutos, e pro su mègius curtzumetràgiu, a suta de sos 45 minutos, cun duas setziones diferentes: fintzione e documentàrios.

Pro sos binchidores prèmios in dinari e àteru.

In s’editzione de ocannu ddo’at a èssere puru s’òpera binchidore de su cuncursu Kentzeboghes, promòvidu dae Associazione Culturale Babel, paris cun Società Umanitaria – Cineteca Sarda de Casteddu, Ejatv, Areavisuale Film e Associazione Boxis, pro pellìculas in sas diferentes limbas de Sardigna.

S’iscadèntzia pro s’iscritzione est su 30 de làmpadas.

(redatzione)

Leave a comment

Send a Comment

S'indiritzu email tuo no at a èssere publicadu.