Babbo, Papà o Papi? Mègius Babbu a sa sarda

– de Martine Faedda –

Oe 19 Martzu si festant is babbos, cunforma a una traditzione otzidentale reghente, nàschida in su ‘900. Carchi die a oe amus lèghidu un’artìculu de “La Nazione” interessante meda, a pitzu de s’òrìgine de sa paràula “Babbu” e de su relativu s’ispartzinamentu de s’àtera, “Papà”.

Duncas, a su chi chi amus lèghidu, “Babbu” est unu faeddu autòctonu, locale, difùndidu meda in s’ala tzentrale de s’Itàlia, Toscana, Marche, Làtziu setentrionale, Romagna, Ùmbria e, mancu a ddu nàrrere, in s’ìsula de Sardigna.

“Papà”, est unu frantzesismu impitadu meda in s’Itàlia setentrionale, pro resones de làcana ma finas in s’Itàlia meridionale pro chistiones istòricas. Is duas paràulas sunt ambas comunas de su primu limbàgiu de is pipios, gràtzias a is sìllabas chi si torrant a repitere.

Si pensat chi “babbu” siat una forma afetiva mancari est beru s’imbesse, ca resurtat de impreu “formale” simulare a “padre”.

Est documentadu chi, in s’Itàlia de s’otighentos, “Papà” beniat seberadu dae is famìllias pro chistione sotziale, in ue is possidentes preferiant a s’istesiare dae su pòpulu minudu. Totu connoschent sa locutzione “figlio di papà” e nemos at mai intesu “figlio di babbo”.

In Sardigna su sèberu de “Papà” essit a campu cun su “boom econòmicu” a pustis de sa de duas gherra mundiale, in ue is generatzione noas, mescamente cussas chi biviant in is tzitades, seberaiant custu tèrmine pro resones de distintzione sotziale.

Cussos prus abbistos ant giai bidu unu parallelu cun sa chistione de sa limba sarda. Difatis, in cussu perìodu matessi, s’incomintzaiat a prefèrrere s’italianu a su sardu pro resones de distintzione sotziale comente si preferiat “Papà” a “Babbu”, pro istesiare is fìgios dae sa timoria de unu passadu mìseru e peleosu.

Oe, chi castiamus custas cosas dae a tesu, finas gràtzias a una maturidade chi protzedit dae sa preparatzione iscolàstica cumprida, podimus chistionare cun serenidade de tzertos sèberos passados.

Est a nàrrere chi “Babbu” balet cantu de “Papà” e su Sardu balet che a s’Italianu. Est a nàrrere chi connòschere su Sardu est Cultura manna, gasi etotu comente a connòschere s’italianu o un’àtera limba istràngia.

Beru est chi tocat de s’ammentare chi “Babbu” est su tèrmine traditzionale nostru comente su sardu est sa limba de is sardos. Podent e devent bìvere bene meda paris cun àteros còdighes modernos, ma refudare unu o s’àteru nos faghet totus prus pòberos.

http://www.lanazione.it/firenze/festa-del-pap%C3%A0-201-1.1982464

Leave a comment