Su Cumandu Provintziale de sos Carabineris de Casteddu at afortigadu sas indàgines pro sas “trufas” in lìnia, sas frigaduras telefònicas e sas furas de identidade in totu su territòriu. Sas operatziones ant batidu a sa denùntzia de paritzas pessones responsàbiles de atividades illegales, chi ant fatu balangiare deghinas de mìgias de èuros, corfende sa parte prus dèbile de sa populatzione.
Sos trufadores sunt semper prus abbistos e impreant istrategias psicològicas fines. Intre a sos casos prus pesosos b’est cuddu capitadu in su Sàrrabus, in ue unu pensionadu est istadu frigadu dae un’òmine bestidu de Maresciallu de Carabineris; cumbintu de collaborare a un’operatzione de giustìtzia, sa vìtima at pagadu cun bonìficos istantàneos deghinas de mìgias de èuros primu chi su malefatore aeret fatu pèrdere sas orminas suas.
Est impreada meda puru sa “trufa de su parente fintu”: in Sant’Antiogu e Gùspini, carchi betza est istada cumbinta a garrigare cartas pre-pagadas cretende de agiudare sos fìgios in dificurtade. Semper in Sant’Antiogu, una fartza impiegada de banca at furadu agiumai 1.300 èuros a unu pensionadu cun s’iscusa de pònnere fine a una frode chi non bi fiat.
A resurtare una trampa fitiana est su setore de s’e-commerce. In Gonnosfanàdiga, unu giòvanu s’at imbussacadu 13.500 èuros pro una màchina mai cunsignada. Casos che paris de màchinas agrìcolas pantàsima sunt istados sinnalados in Furtei e Samatzai. In Dolianova est istada denuntziada una trufa pro sa còmpora de su pellet, mentras in Pauli (Monserrato) sunt essidas a pìgiu fintas pòlitzas de asseguratzione RCA.
Atentzione particulare est dedicada a sas furas de identidade digitale. Semper in Dolianova, duos giòvanos promitiant dinari in càmbiu de retzensiones in lìnia, faghende·si imbiare però sas fotos de sos documentos de sas vìtimas pro abèrrere contos currentes foras de lege, pro su riciclàgiu. In fines, in Pauli Gerrei (Santu Nicolò), est essida a pìgiu sa trufa de sos “balàngios fàtziles” pro sa cumpartzidura de vìdeos in ue si pagaiant commissiones fintas.
Bobore Taras
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment