Non b’at bisòngiu de nch’iscùdere s’ograda a sas pàginas econòmicas o polìticas pro cumprèndere ite est s’isblocu de sos litzentziamentos aprontadu dae su guvernu Draghi. Est bastante a non si nch’essire dae sas de s’atualidade. Sa gherra de sos traballadores de sa Gkn in Campi Bisenzio, Frorèntzia, est cosa chi sos giornales devent sighire si cherent “stare sul pezzo”, non pro sos disinnos de sos meres ebbia ma mescamente pro sa risposta operaja. Faeddos comente “Insorgiamo” (pesemus·nos), “Da qui non esce niente” (dae inoghe nudda nche bogant, in riferimentu a sos machinàrios) e àteros nos ammustrant su livellu de cumbatividade de una comunidade sindacalizada e, mescamente, policizada. Sa fàbrica est ocupada e sos traballadores ant postu in contu sa possibilidade de pèrdere sa gherra, in prus de su traballu. Ma issos etotu narant chi “est semper a pèrdere francu cando binchimus”. S’ispera de sos de sa Gkn est chi finamentas in àteros logos sa metodologia polìtico-sindacale (o a s’imbesse) siat sa matessi. Ca isolados perdent. Ca chie si ìsolat at giai pèrdidu.
https://www.facebook.com/coordinamentogknfirenze/videos/546335423455107
màuru piredda
foto Michele Lapini
Leave a comment