Arrennegu nieddu

Arrennegu nieddu

Unu pìgiu de chinisu est faladu in sos coros de sos sardos: su Monteferru est brusiadu belle che totu. Gente meda at pèrdidu totu e un’erèntzia naturalìstica de importu est isciusciada. Sa tristura s’ammisturat a su fele, e non petzi contra a chie at allutu su fogu, ca custa disaura no benit a s’ispessada. L’amus naradu fintzas nois chi su perìgulu fiat mannu meda, ma sas framas ant agatadu una situatzione chi las at agiudadas.

Sos responsàbiles de sa Forestale fiant decadidos dae s’inghitzu de trìulas, su logu fiat pagu contivigiadu, comente at proadu su fogu de s’ogiastru millenàriu de Cùglieri, e comente testimòniat sa litera de su comitadu pro su Monteferru. Mèdia medas, a su sòlitu, sunt proende a dare sa neghe a sos piromanes – aupas chi iscumparent a sas primas ischintiddas e chi paga bortas s’agatant – ma pro more de sas retzas sotziales sunt essende a campu sas tortesas de unu sistema malàidu.

Sas cosas de fàghere sunt medas: dare su permissu a sa populatzione de contivigiare sos padentes, comporare una flota de aèreos e elicòteros de propiedade de sa Regione, comente in Còrsica, e mescamente sanare unu sistema de gestione chi non sighit su bonu de totus.

Gabriele Tanda

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *