Dae su 2017 sa Fondazione Maria Carta mandat a in antis su progetu Freemmos, contra a s’ispopulamentu de sas biddas sardas. Su 4 de santandria una delegatzione de sa fundatzione, cun su presidente Marras, at acumpangiadu in terra de Ispagna a Maria Anna Camedda, sìndigu de Baràdili, e a su vitzesìndigu Lino Zedda.
Sa meta de su biàgiu fiat sa bidda aragonesa de El Frago. Ddos at retzidos s’esponente de sa giunta Paloma García. Baràdili est sa prus bidda pitica de Sardigna pro abitantes, chi non lompent a 100. Sa comunidade aragonesa puru est gherrende pro non si nch’ispèrdere. Tenet 130 abitantes.
In su 2020 El Frago, paris cun Biel, Fuencalderas, Orés e Santa Eulalia del Gállego, totu biddas de s’ala de Las Cinco Villas, ant aderidu a su Proyecto Arraigo, est a nàrrere progetu arraighinamentu. S’initziativa est nàschida pro agiuare gente de tzitade a si nch’andare a biddas piticas de zonas rurales de Ispagna chi sunt perdende abitantes. Tra sos protagonistas de custu progetu ddo’est pròpiu Paloma García, chi in su 2021 at lassadu Bartzellona pro sa bidda aragonesa.
Sa zona de Las Cinco Villas tenet un’importàntzia simbòlica puru, bidu ca una de sas chimbe biddas chi dant su nùmene a su territòriu est Sos del Rey Católico, in ue est nàschidu Ferdinandu de Aragona.
Sos amministradores sardos si sunt atopados cun sos collegas ibèricos, a prus de García su sìndigu José Ramón Reyes e su responsàbile de sa cultura Miguel Ramírez. Prus a in antis ant a èssere sos ispagnolos a bisitare a Baràdili. Sas duas biddas sunt aprontende un’afradiamentu, cun s’imprimatur de s’Unione Europea. Custu est su primu passu.
Pro dare un’idea de sa cultura sarda a sos ispagnolos fiant presentes finas Giacomo Serreli, sos sonadores Vanni Masala a su sonete e Jonathan Della Marianna a launeddas, pipajolu e trunfa, paris cun duos ballerinos de su grupu folk Città di Tempio. Ant sonadu puru sonadores aragonesos chi ant propostu mùsicas traditzionales issoro.
(gianni muroni)
Leave a comment